Մահվան ելքով վրաերթ՝ Փարաքարի ճանապարհին

Այսօր՝ մայիսի 13-ին, վրաերթ է տեղի ունեցել Արմավիրի մարզում: Ժամը 21:00-ի սահմաններում 29-ամյա Հարություն Տիրացույանը Երևան-Վաղարշապատ ավտոճանապարհի՝ Փարաքար գյուղի վարչական տարածքում, վարելով «Opel Astra» մակնիշի՝ 35 SD 055 համարանիշի ավտոմեքենան, վրաերթի է ենթարկել հետիոտնին:

Ինչպես հայտնում է shamshyan.com-ը, վրաերթի ենթարկվածը տեղափոխվել է Էջմիածնի բժշկական կենտրոն, որտեղ մահացել է: Դեպքի վայր են ժամանել Ոստիկանության Վաղարշապատի բաժնի օպերատիվ խումբը՝ Վաղարշապատի ոստիկանապետի օպերգծով տեղակալ Սուրիկ Մելքոնյանի գլխավորությամբ:

Ժամանել են նաև Ճանապարհային ոստիկանության 2-րդ սպայական գումարտակի 1-ին վաշտի աշխատակիցները՝ վաշտի հրամանատար Տիգրան Գրիգորյանի գլխավորությամբ: Ժամանել է նաև ՃՈ 2-րդ սպայական գումարտակի հրամանատար Սուրեն Խուդոյանը: Վրաերթի վայրում քննչական աշխատանքները ղեկավարում է Ոստիկանության Քննչական գլխավոր վարչության Արմավիրի մարզի քննչական բաժնի Վաղարշապատի քննչական բաժանմունքի քննիչ Ռաֆիկ Դոխոյանը:

Քիչ առաջ Վաղարշապատի ոստիկանները պարզեցին, որ մահացածը Էջմիածին քաղաքի Մ. Խորենացու 20 Ա շենքի բնակիչ 47-ամյա Մաքրուհի Մուսոյանն է: Գ. Շամշյանը հայտնում, է, որ վարորդը փախուստի չի դիմել, հետիոտնին, ով փողոցը անցնելիս է եղել չթույլատրելի հատվածով, օգնել է, որպեսզի տեղափոխեն հիվանդանոց: Ֆոտոլրագրողը հայտնում է, որ նշված փողոցում բացակայում է արտաքին լուսավորությունը, քանի որ էլեկտրացանցի չինովնիկները հրաժարվել և արգելել են գյուղացիներին միացնեն էլեկտրական լույսերը, մինչդեռ էլեկտրական սյուները տեղադրվել են գյուղացիների ուժերով: Եվ եթե արտաքին լուսավորությունը լիներ, հնարավոր է մահվան ելքով վրաերթը տեղի չունենար։