«Ուզում եմ հիշվել, ավելին չեմ ուզում...». 15 տարի՝ առանց լեգենդար Սինատրայի

«Ես ուզում եմ հիշվել որպես մի մարդ, ով հիանալի է անցկացրել իր ժամանակը՝ ապրելով իր կյանքով, մարդ, ով լավ ընկերներ է ունեցել, հիանալի ընտանիք. ես չեմ կարծում, որ, ըստ էության, սրանից ավելին կարող եմ ուզել....»։ Ֆրենկ Սինատրա

Ֆրենսիս Ալբերտ Սինատրան ծնվել է 1915 թվականի դեկտեմբերի 12-ին Նյու-Ջերսի նահանգում: Հայրը բռնցքամարտիկ-հրշեջ էր, իսկ մայրը` բուժքույր: Երիտասարդ տարիքում Սինատրան շատ մասնագիտություններ է փորձել, այդ թվում` մատուցող և սպորտային մեկնաբան: Սակայն նա մի բանի մասին էր երազում՝ բեմում լինել: Սինատրան սկսում է երգել քոլեջի պարային երեկոների ժամանակ, մասնակցում է սիրողական մրցույթների, իր ծառայություններն է առաջարկում փոքրիկ ռադիոկայաններին:

Նրան սիրով ընդունում են, սակայն պատճառը նրա տաղանդը չէր: Ամեն ինչ շատ ավելի պարզ էր. երիտասարդ երգիչը փող չէր պահանջում:

1937-ին Ֆրենկը հաղթում է փոքրիկ սիրողական մրցույթում: Երգում է գիշերային ակումբում:

Այդ ժամանակ նա հանգիստ ու հավասարակշիռ կյանք էր վարում: Նա ամուսնանում է համեստ ու գրավիչ Նենսի Բարբատոյի հետ և երեք երեխա ունենում:

1939-ին Ֆրենկին հաջողություն է ժպտում. ջազային նվագախմբի ղեկավար Թոմմի Դորսը նրան աշխատանք է առաջարկում շաբաթական 75 դոլարով:

1940-ին թողարկվում է նրա ձայնասկավառակը: 1942-ի դեկտեմբերի 30-ին Սինատրան աստղ է դառնում:

1941-ին Սինատրան նկարահանվում է «Լաս-Վեգասի գիշերները» ֆիլմում, ինչից հետո սկսում է պարբերաբար երաժշտական համարներով հանդես գալ ֆիլմերում: Այդ ժամանակ ասպարեզ են դուրս գալիս նոր անուններ` Ֆրենկի Լեյն, Թոնի Բենեթ, իսկ Սինատրայի համերգներին ավելի ու ավելի քիչ մարդիկ են գալիս: Երգիչը պարտքերի տակ է ընկնում, ձախողում բազմաթիվ հեռուստաշոուներ: Հետո դրանց ավելանում է դերասանուհի Ավա Գարդների հետ սիրավեպը: Ընկերները զուր փորձում են նրան համոզել չամուսնալուծվել, քանի որ վստահ էին, որ դա կվնասի նրան:

1951-ին Սինատրան ամուսնալուծվում է, իսկ երկու օր անց ամուսնանում: Նրանք պաշտոնապես ամուսնանում են 1957 թվականին: Դրանից հետո Սինատրան ևս երկու անգամ ամուսնանում է: Երրորդ կինը՝ դերասանուհի Միա Ֆերրոուն, երեսուն տարով երիտասարդ էր նրանից:

1976-ին Սինատրան չորրորդ և վերջին անգամ ամուսնանում է Բարբարա Մարկսի հետ: Սինատրան նկարահանվել է 58 ֆիլմում:

1994-ին նա թողարկում է իր վերջին՝ «Դուետներ» ձայնասկավառակը:

Վերջին տարիներին նրա անվան հետ կապված բոլոր բիզնեսներով զբաղվում էր նրա դուստրը: Սինատրան մահացավ 1998 թվականի մայիսին 14-ին: