Բրյուսելի միջազգային օդանավակայանը կաթվածահար է գործադուլի պատճառով. մարդիկ մնացել են առանց ուղեբեռի

Բելգիայի մայրաքաղաք Բրյուսելի միջազգային օդանավակայանում Swissport Handling ավիաընկերության աշխատակիցների գործադուլի պատճառով ավելի քան 20 հազար մարդ չի կարողանում վայրէջքից հետո ստանալ իր ուղեբեռը: Ինչպես գրում է ИТАР-ТАСС-ը, հղում կատարելով օդանավակայանի մամլո ծառայությանը, կիրակի օրվանից շարունակվող գործադուլի արդյունքում չեղյալ է հայտարարվել ավելի քան 60 չվերթ:

Գրանցված ուղեբեռը կնքվում է և պահեստավորվում օդանավակայանի հատուկ սրահում: Հենց որ գործադուլն ավարտվի, ուղեբեռը կառաքվի իրենց տերերին անկախ նրանց գտնվելու վայրից. վստահեցնում է օդանավակայանի ղեկավարությունը:

Այս պահին Բրյուսելի օդանավակայանը խորհուրդ է տալիս իր օդային տարածքից օգտվող ուղևորներին ճանապարհորդել առանց ուղեբեռի՝ միայն ձեռքի պայուսակներով: