Սեփական հարվածի կորուստները. ի՞նչ կորցրեց Գագիկ Ծառուկյանը

Ծայրահեղ ընդդիմադրի կեցվածք ընդունած կուսակցությունները կարծես մի վերջին անգամ թափ տվեցին հայ հասարակությանը՝ ցուցաբերելով իրենց համար առավել շահեկան մոտեցումներ ընտրություններից յուրաքանչյուրում:

Եվ այսպես, մի վերջին անգամ հայացք նետելով վերջին ընտրություններին, ասել է թե՝ Երևանի ավագանու ընտրություններին, գալիս ես մի պարզ եզրահանգման՝ հասարակությունն այսօր դատապարտված է ռեժիմի անկատարությանը: Եվ այս պարագայում հետաքրքրական է հենց այն քաղաքական ուժերի հեռանկարը, որոնք որդեգրել էին փոխել իրավիճակ՝ սկսած նախագահական ընտրություններից, մինչև Երևանի ավագանու ընտրություններ:

Վերջին ուժը, որը վարվեց այդպես, այսօր արդեն ռադիկալորեն տարբերվող վարքագիծ է դրսևորում, կարծես շաբաթներ առաջ իրենք չէին, որ Ազատության հրապարակում հավիտենական պայքար էին դավանում. խոսքը, իհարկե, «Բարգավաճ Հայաստան» կուսակցության մասին է:

Այն, որ աշնանային նստաշրջանին ընդառաջ ԲՀԿ-ն հանդգնել էր հղանալ նոր կարգավիճակ ստանձնելու գաղափարը, այսօր դա արդեն ի չիք է դառնում այն ֆոնին, որը բացվում է Աբովյան քաղաքի վրա. ԲՀԿ նախագահ Գագիկ Ծառուկյանը, Հայաստանում նմանը չունեցող երևույթի հեղինակ-կազմակերպչի պաշտոնն ու դերը ստանձնած, Աբովյանում  համախմբում է բոլորին՝ Սերժ Սարգսյանին, Ռոբերտ Քոչարյանին և Լևոն Տեր-Պետրոսյանին. ահավասիկ, միանշանակ չէ այն, որ կժամանեն բոլորը, սակայն որ փաստը կարող է դառնալ բեկումնային հասարակության համար, անվիճելի է, բեկումնային այն առումով, որ ընդդիմադիր համարվող ուժը հայաստանյան իրականությունում կարող է ունենալ տարածաշրջանի մասշտաբով լավագույններից մեկը համարվող զվարճանքների համալիր, անգամ ավելին՝ երկրի նախագահն է հենց, որ զարկ է տալիս դրա բացմանն ու բարգավաճմանը:

Այո, եղած կարծրատիպերը ժամանակի ընթացքում փոխվում են, այսուհետև Հայաստանում էլ ընդդիմադիր համարվող ուժերը կարող են ունենալ գերշահութաբեր բիզնեսներ, ժամանցի կենտոններ, մի խոսքով՝ արխային կարող են դիզել հարստություն, մինչդեռ մինչ այսօր նմանատիպ երևույթը Հայաստանում ոչ միայն բացառվում էր գործնականորեն, այլև անգամ տեսականորեն էր ժխտվում այդ մասին միտքը:

Իհարկե, Սուրբ Հովհաննես եկեղեցու ու «Փարավոն» համալիրի բացումը լավագույն առիթն էր, որը կարող էր դառնալ այն խարիսխը, որով կարելի կլիներ վերարտադրել ոչ վաղ անցյալում ԲՀԿ-ՀՀԿ կոալիցիոն ջերմ հարաբերությունները:

Եվ ահա միտքը իրեն շատ սպասեցնել չտվեց, ու պարզվեց, որ ԲՀԿ-ն Երևանի ավագանու ընտրությունների արդյունքում իրեն բաժին հասած մանդատներից չի պատրաստվում հրաժարվել, սա, իհարկե, ունեցած այն վստահության պարագայում, որը ենթադրում է նաև «Ժառանգություն» կուսակցության մանդատներից չհրաժարվելը:

Այսինքն՝ ստացվում է, որ ԲՀԿ-ն արդեն բացահայտորեն նորից մտնում է նույն առուն, այսինքն՝ քաղաքական դաշտում նորից ուրվագծվում է ԲՀԿ-ՀՀԿ կոալիցիայի պատկերը: Սա, իհարկե, հերթական հարվածը կլինի ԲՀԿ-ին՝ առաջին հերթին որպես քաղաքական ուժ, ապա նոր միայն հարվածների ազդեցությունը կկրեն կուսակցության ներկայացուցիչները, մասնավորպես՝ Գագիկ Ծառուկյանը:

Հերթական անգամ չկորցնելով ոչինչ՝ իհարկե, ֆինանսական առումով միայն, Գագիկ Ծառուկյանը կորցրեց նախագահական ընտրություններից հետո մնացած վստահության վերջին նշույլը, որն ուներ հասարակության, ժողովրդի աչքերում, սակայն այս ամենից Գագիկ Ծառուկյանը կարող է կորցնել նաև «Բարգավաճ Հայաստան» կուսակցությունն ընդհանրապես:

Գևորգ Ավետիսյան