Եղեգնաձորի ներառական դպրոցի անակնկալը

Եղեգնաձորի Հովհաննես Հովհաննիսյանի անվան ներառական կրթությամբ դպրոցը վերջապես ունեցավ մեկ անվասայլակ, որով դպրոցումսովորող հաշմանդամություն ունեցող երեխաները կկարողանան տեղաշարժվել դպրոցի տարածքում: Դեռևս ամիսներ առաջ Մարդու իրավունքների պաշտպանի Վայոց ձորի տարածքային գրասենյակի աշխատակիցները եղել էին դպրոցում և ծանոթացել հաշմանդամություն ունեցող աշակերտների խնդիրներին: Առաջնային խնդիրներից անվասայլակների ձեռքբերման հարցն էր, որոնց բացակայությունը լուրջ խոչընդոտ էր հենաշարժողական խնդիրներ ունեցող երեխաների համար: Դպրոցի տնօրինությունը դիմել էր մի շարք պատկան մարմինների, սակայն այդպես էլ այդ խնդիրը լուծում չէր ստացել:

Օրերս Պաշտպանի Վայոց ձորի տարածքային գրասենյակի աշխատակիցներն ու «Սատար» հասարակական կազմակերպության անդամները կրկին այցելել էին դպրոց, սակայն այս անգամ ոչ դատարկաձեռն: «Սատար» հասարակական կազմակերպության նախագահ Հունան Հունանյանն իր պատրաստակամությունն էր հայտնել օգնելու հենաշարժական խնդիրներ ունեցող երեխաներին՝ դպրոցին նվիրաբերելով մեկ անվասայլակ: Բացի այդ պարոն Հունանյանի օգնությամբ հաշմանդամություն ունեցող մի քանի երեխաներ Ջերմուկի մանկական առողջարանում հանգստանալու ուղեգրեր ստացան: Սակայն սա դեռ առաջին ձեռքբերումն էր: Դեռ կան բազում խնդիրներ, որոնք լուծման կարիք ունեն: