Մագա. «Իմ առաջին մեքենան եղել է «Զապոռոժեց»»

Վերջերս Հանրային երկրորդ հեռուստաալիքով հեռարձակող «Մագա ավտո» հաղորդաշարը դարձավ տասներկու տարեկան:

Հաղորդավարորդուհի Մագան չկարողացավ անգամ մտաբերել, թե քանի հաղորդում է թողարկվել այս տասներկու տարիների ընթացքում: Հիշեցնենք, որ հաղորդաշարը «ծնվել է» 2001 թվականի մարտի քսանվեցին և եթեր էր հեռարձակվում «Ար» հեռուստաընկերությամբ: «Ղեկավարությունն այն ժամանակ որոշել էր հաղորդումն առաջին անգամ եթեր դնել իմ ծննդյան օրը, որ ինձ համար այդ օրը կրկնակի տոն լիներ»:

Նախնական շրջանում հաղորդաշարը եթեր էր հեռարձակվում շաբաթական երկու անգամ»,-ArmStar.am-ի հետ զրույցում պատմեց Մագան: Հիմա այն յուրաքանչյուր կիրակի նոր հաղորդումով եթերում է Հ2-ով: «Դե պատկերացրեք, թե հաղորդումների ընդհանուր քանակն ինչքան շատ է եղել»: Այս տարի Մագան իր և իր հաղորդաշարի ծննդյան օրն անցկացրել է Դուբայում: «Շատերը կարծում են, թե գնացել էի այնտեղ ծունդս նշելու, բայց ճիշտ հակառակը՝ գնացել էի, որ չնշեմ»,-ծիծաղով ասաց հաղորդավարուհին: Նա պատմեց նաև, որ ավելի մեծ շուքով նշում է հաղորդաշարի ծնունդը՝ երբեմն նույնիսկ անտեսելով սեփականը:

Մագան մեզ հետ զրույցում պատմեց, որ միշտ նկարահանումների ընթացքը շատ հետաքրքիր է լինում. «Նախ մեր հյուրերը տարբեր ոլորտներից են՝ երգիչ, դերասան, բժիշկ, քաղաքագետ, առհասարակ հայտնի մարդիկ, դրա համար էլ հաղորդումների նկարահանումներն էլ շատ հետաքրքիր են անցնում: Ի սկզբանե հաղորդումն այլ ֆորմատով էր թողարկվում: Բազում այլ էջեր կային, որոնք ակտուալ էին այն ժամանակ, իսկ հիմա՝ ոչ: Օրինակ՝ օգտակար խորհուրդներ էջը, երբ մեքենաների տեխնիկական մասի հետ կապված խորհուրդներ էին տրվում»:

ArmStar.am-ի հետ զրույցի ընթացքում Մագան պատմեց, որ հաղորդաշարի շրջանակներում լինում են ուղևորություններ տարբեր ուղղություններով: «Եղել են գողծուղումներ Արաբական Էմիրություններ, Ուկրաինա, Ռուսաստանի Դաշնություն և այլն, որտեղ հիմնականում եղել են ավտոցուցահանդեսներ, ավտոշոուներ՝ պատմական մեքենաներ, մոտոցիկլետներ, ընդհուպ մինչև սաֆարի, որը մենք անապատում կազմակերպել էինք անցած տարի «Մագա ավտո»-յի տասնմեկ ամյակին նվիրված:

Մագան պատմեց, որ նկարահանումները շատ ուրախ են անցնում, լինում են արկածներ, շատ հաճախ խափանվում են մեքենաները, այնքան հաճախ, որ արդեն այդ երևույթը սովորական է դարձել: «Վերջին նկարահանումը դերասան Ստեփան Ղամբարյանի հետ էր, ով լսարանին ավելի հայտնի է «Եղբայրները» սերիալից որպես Ռաֆո: Եվ այսպես, նկարահանման վերջում եկավ այն պահը, երբ ես պետք է իր՝ որպես վարորդի մասին իմ կարծիքն արտահայտեմ, ես իրեն ասում էի, որ շատ ուշադիր վարորդ ես, սխալ էին ասում, թե իբր դու անուշադիր ես, ու հանկարծ նկատեցի, որ ջուր է կաթկթում մեքենայի տակից ու ես նկարահանման ժամանակ բարձրաձայնեցի. «Վա~յ, ջուր է կաթում»: Հետո սկսեցինք քննարկել՝ գուցե խողովակ է ճաքել…»,-ծիծաղով պատմեց Մագան:

Սա իհարկե «պատահարներից» չարյաց փոքրագույնն է, դեպք է եղել, երբ նկարահանման ժամանակ վթար է տեղի ունեցել: «Մի անգամ մի վատ բան եղավ, բայց լավ էր, այն առումով, որ հետևանքը վատ չեղավ: Նկարահանման էինք դերասան Սարգիս Գրիգորյանի և կնոջ Մանոյի հետ: Ես նկարահանման ժամանակ հարցրի՝ հետիոտներին զիջու՞մ ես, պատասխանեց՝ այո', միշտ զիջում եմ Մագա ջան, ու այդ պահին, հետևից մեզ հարվածեց մի գազել՝ երթուղային տաքսի: Նոր տարուց առաջ էր՝ տոնական հաղորդում էր, ու ես ինքս էի ծրագրել, որ մանկատուն պիտի գնանք: Մի խոսքով, մենք մեքենայից իջանք: Երբ Սարգսին տեսան, ճանաչեցին. «Վա~յ, էս էն դերասանն ա», երբ և օպերատորն իջանք, իրենք ապշեցին. «Վա~յ, Մագա ավտոն էլ մեջն ա», զարմացան, թե լավ, էդ ոնց կարող էին դասավորել, որ ես միանգամից միկրոֆոնը ձեռքիս հարց եմ տալիս: Դե Սարգիսի մեքենային գրեթե բան չէր եղել՝ ճապոնական ամենագնաց էր, իսկ այդ գազելի առջևի մասը կոտրվել էր»,-արկածախնդրությամբ պատմեց Մագան:

Ի դեպ, Մագան արդեն տարիներ շարունակ ճանաչված է որպես ՀՀ լավագույն կին-վարորդ: Համեստ զրուցակիցս չցանկացավ ինքն իրեն որակել որպես այդպիսին, բայց այնուամենայնիվ պարզաբանեց, որ երևի դա նրանից է, որ լինելով նման հաղորդաշարի վարող, հետևում է երթևեկության կանոններին: Թեև Մագան օրինակելի վարորդ է, այնումենայնիվ, ArmStar.am-ի հետ զրույցի ընթացքում հաղորդավարուհին ղեկին նստած, մեքենա վարելով զրուցում էր մեզ հետ հեռախոսով: Սա իհարկե ապացուցում է, որ Մագան արհեստավարժ վարորդ է: «Ես գիտեմ, որ լավ վարորդ եմ, քանի որ ինը տարեկանից եմ մեքենա վարում՝ եղբայրս է սովորեցրել վարել: Իհարկե հնարավոր է նաև խախտումներ անել, ինչպես բոլորը: Առհասարակ շատ ակտիվ վարորդ եմ, չեմ կարող ժամերով ընկնել մի մեքենայի հետևից ու գնալ: Ամենակարևորը պետք է գրագետ վարել»:

Այս և նման անվանակարգերում Մագան միակն է, նա նաև ունի կին վարորդների ֆեդերացիա, որի նախագահն է: «Ես կին վարրդներին սովորեցնում եմ կանոնները, հատկապես ուշադրություն եմ դարձնում «փարքինգ»-ի՝ կայանման վրա»,-ավելացրեց զրուցակիցս:

ArmStar.am-ին Մագան զարմացրեց՝ պատմելով, որ 1999 թվականին նա մասնակցել է միջազգային ռալիի: «Ես միակ աղջիկ մասնակիցն էի և տարիքով ամենափոքրը: Հայաստանի այդ ռալի-շոուին անվանի մարզիկներ էին մասնակցում, մի խոսքով ես բավական լավ արդյունք եմ ցույց տվել, տարբեր մրցույթների հաղթող եմ ճանաչվել»: Ինը տարեկանից մեքենա վարելով՝ Մագան շատ մակնիշներ չի փոխել: «Ես առհասարակ պահպանողական եմ, հիմա ավելի նախապատվություն եմ տալիս ամենագնացներին՝ արտաճանապարհային մեքենաներին: Առաջին մեքենան եղել է «Զապոռոժեց» մակնիշի մեքենան: Շատ դաժան ձևով եմ վարել սովորել: Եղբայրս ինձ տանջում էր, ասում էր՝ «Այ էսինչ բանն արա, քեզ վարել կսովորեցնեմ»,-կատակեց Մագան: Մագայի «երազանքներից է եղել նաև «Նիվա» մակնիշի մեքենա ունենալը, որն իրագործեց ու երկար ժամանակ հենց այդ մեքենայով էլ մասնակցում էր տարբեր մրցույթների: Վերջերս՝ ապրիլի յոթին, Մագան իր կին վարորդ սաների հետ միասին Հարապետության հրապարակում կազմակերպել էր ձևավոր վարման առաջնություն:

Զրուցեց Աշխեն Մնացականյանը /ArmStar.am/