Շուշանիկ Արևշատյանի դստեր հարսանիքին ներկա է եղել անգամ առաջին տիկինը

Անցած ամիս՝ ապրիլի 27-ին, ռադիոմագնատ Շուշանիկ Արևշատյանն ամուսնացրեց աղջկան: Այժմ esyes.am-ն ունի հարսանեկան բացառիկ լուսանկարներն ու տարբերվող այս հարսանիքի մանրամասները, որոնք էլ ներկայացնում ենք մեր ընթերցողներին:

Մեզ հետ զրույցում նորաթուխ զոքանչ տիկին Շուշանիկը նշեց, որ աղջկա՝ Աննայի և նրա ընտրյալի՝ Ալեքսանդրի պսակադրությունը տեղի է ունեցել Սուրբ Գայանե եկեղեցում: Նրա փեսան շինարարական բիզնեսով է զբաղվում: «Աննան և Ալեքսանդրը իրենց հանդիպումից 14 տարի անց են ամուսնացել: Նրանք միմյանց ճանաչում են դպրոցից, երբ Ալեքսանդրը 10-րդ դասարանում էր սովորում, իսկ Աննան՝ 8-րդ: Շատ երկար ճանապարհ են անցել, մինչ հասկացել են, որ իրար համար են ստեղծված»,-պատմեց տիկին Արևշատյանն ու ավելացրեց, որ Աննան ուզում էր սովորել, կարիերան զարգացնել, իսկ Ալեքսանդրը մինչև վերջ համբերությամբ սպասեց ու հասավ իր նպատակին:

Աննայի և Ալեքսանդրի հարսանիքը հարսնացուի մտահղացմամբ անցել է 1930-40-ականների ռետրո ոճով: Հարսանեկան հրավիրատոմսերի վրա գրված է եղել, որ հյուրերը հրավիրվում են մասնակցելու սև ու սպիտակ ֆիլմի նկարահանման, որի վերնագիրը «Մեր մանկության տանգոն» է:

Տիկին Արևշատյանի խոսքերով՝ հրավիրատոմսը ենթադրում էր, որ բոլոր հյուրերը պետք է լինեն ռետրո ոճով հանգնված՝ սկսած սանրվածքից, աքսեսուարներից: «Խնջույքի սեղանները համարակալված չէին, դրանք անվանակոչված էին այս կամ այն հայտնի մարդու, օրինակ՝ Համո Բեկնազարյանի անունով»,- ասաց տիկին Արևշատյանը, ով աղջկա հարսանիքին ընտրել էր պուտիկավոր ռետրո հագուստ:

Տեղեկացանք նաև, որ ամբողջ հարսանիքն է անցել ռետրո մթնոլորտում: Մեքենաները ևս համապատասխան են եղել տվյալ ժամանակաշրջանին, իսկ ռեստորանում հնչել է ռետրո երաժշտություն, ցուցադրվել է 30-ականների պատմությունը ներկայացնող ֆիլմ:

Ի դեպ, հարսանիքի թամադան հագել էր շապիկ, որի վրա գրված էր «Դիրեկտոր»: Նա հարսանեկան ֆիլմի ռեժիսորն է եղել, ինչի արդյունքում բոլոր տեսարանները նկարահանվել են «դուբլերով»:

Նշենք, որ թվով 250 հյուրերի թվում են եղել առաջին տիկին Ռիտա Սարգսյանը և վարչապետի տիկին Գոհար Սարգսյանը:

«Ես»