Գագիկ Ջհանգիրյանի հայտնի «կույս մնալու և հաճույք ստանալու» ասացվածքը ԲՀԿ-ի պարագայում գլուխ չեկավ

«Հիմա ի՞նչ՝ Գագիկ Ծառուկյանի երեկվա հայտարարության մասի՞ն էլ պետք է ասեն, թե մարդու «անձնական կարծիքն է», կուսակցությունը դեռ վերջնական որոշում չի կայացրել: Փաստորեն, Գագիկ Ջհանգիրյանի հայտնի «կույս մնալու և հաճույք ստանալու» ասացվածքը ԲՀԿ-ի պարագայում գլուխ չեկավ. չի կարող կուսակցությունը ոչ իշխանական լինել, ոչ ընդդիմադիր: Ավելի ճիշտ՝ չի կարող նախընտրական շրջանում ընդդիմադիր լինել, ետընտրական շրջանում՝ իշխանական: Ի վերջո, «Բարգավաճ Հայաստանն» անգամ եթե կարողացել է այս ողջ ընթացքում լողալ ու խուսանավել հստակ դիրքորոշումից, ստիպված էր հստակեցնել իր կարգավիճակը և երեկ Գագիկ Ծառուկյանի շուրթերից հնչեցնել կուսակցության պաշտոնական տեսակետը. «ԲՀԿ-ն ընդդիմադիր դառնալ չի կարող»:

Վերջ՝ պարահանդեսն ավարտված է, ֆինիտա լա կոմեդիա, բա շուտ ասեիր: Երեկ այսպես էին արձագանքում ֆեյսբուքյան ակտիվիստներն առաջնորդի հայտարարությանը: Բայց կային նաև այլ հարցադրումներ՝ իսկ ԲՀԿ մյուս ակտիվիստները տեղյա՞կ են եղել այս որոշման մասին: Եթե տեղյակ էին, ապա ինչպե՞ս բացատրել ավագանու ընտրությունների քարոզարշավի բոցաշունչ ճառերը: Ինչպե՞ս հասկանալ Ազգային ժողովում ԲՀԿ քվեարկություններն ու բոյկոտները: Ինչո՞վ բացատրել հենց իր՝ Ծառուկյանի ոչ հեռավոր անցյալի քննադատական ելույթները, ոչ իշխանական կուսակցությունների հետ բանակցություններն ու միավորման փորձերը: Բազում այլ փաստեր ու դրսևորումներ:

Թեպետ «սա Հայաստանն է», և այստեղ ամեն ինչ հնարավոր է, բայց այսքան չկողմնորոշվածություն, այսքան թոզփչոցի, այսքան երեսպաշտություն անգամ ամեն ինչ տեսած ՀՀ քաղաքացին չի կարող մարսել: Մի բան լավ է՝ ընդդիմադիր դաշտն իրոք մաքրվում է, և հուսով ենք, որ այն կզբաղեցնեն ավելի ազնիվ ու ավելի քաղաքական դեմքեր»,- այս մասին գրում է «Հրապարակը»: