Գազի նոր ոդիսականը՝ 90 օրից

Երեկ արդեն իսկ հայտնի դարձավ, որ գազի գնի թանկացումը, թերևս, անխուսափելի է։ «ՀայՌուսգազարդ» ՓԲԸ-ն և «ՀայՌուսգազարդ» ՓԲԸ «Տրանսգազ» ՍՊԸ-ն դիմել են ՀՀ հանրային ծառայությունները կարգավորող հանձնաժողով՝ գազի գնի փոփոխման վերաբերյալ առաջարկով։

Գործող սակագինը յուրաքանչյուր հազար նորմալ խորանարդ մետրի համար 132 000 դրամ է (ներառյալ ԱԱՀ), իսկ «ՀայՌուսգազարդ»-ը հանդես է եկել առաջարկով, որ գազի գինը բարձրանա և դառնա 221 000 դրամ։

ՀՀ հանրային ծառայությունները կարգավորող հանձնաժողովի մամուլի բաժնից Մարիամ Ստեփանյանը Լուրեր.com-ի հետ զրույցում հայտնեց, որ հանձնաժողովի կողմից սահմանված կարգը ենթադրում է հայտի ուսումնասիրություն 90 օրվա ընթացքում։ «Դա չի նշանակում՝ 90-րդ օրը կամ 3-րդ օրը։ Երբ հանձնաժողովը պատրաստ կլինի, կունենանք մեր գնահատականը և եզրակացությունը, կխոսենք»,-ասաց Ստեփանյանը։

Նշենք, որ արդեն տևական ժամանակ է, ինչ քննարկումներ են գնում գազի գնի թանկացման վերաբերյալ։ Գազի գնի թանկացում նախատեսվում էր մինչ նախագահական ընտրությունները, սակայն կային տեսակետներ, որ իշխանությունները կանեն ամեն բան, որ խուսափեն թանկացումից, և գնի փոփոխությունը կլինի ընտրություններից հետո նոր միայն։

Մի քանի ամիս առաջ էլ՝ «Ժամանակ» օրաթերթի հրապարակման համաձայն՝ Ռուսաստանը Հայաստանին վաճառվող գազի գնի թանկացումը մեկ տարով հետաձգել է՝ շնորհիվ ռուսաստանաբնակ հայ գործարար Սամվել Կարապետյանի:

«Մեզ հայտնի է դարձել, որ նա Ռուսաստանում շահել է շինարարության մեծ տենդերներ, մի քանի տարով, և ռուսական կողմին առաջարկել է ձեռընտու պայմաններ: Այսինքն այդ գործում Կարապետյանը նվազագույնի է հասցրել իր շահույթը, փոխարենը ՌԴ իշխանություններին առաջարկել է Հայաստանի հետ պայմանավորվել գազի ձեռընտու գին»,-գրել էր թերթը: