«Ես ու «Հարազատ թշնամի» սերիալի իմ կերպարը, շատ տարբեր ենք»

Սերիալները մեր կյանքում անփոխարինելի տեղ ունեն: Թեև մեզանից յուրաքանչյուրն իր կյանքում գոնե մեկ անգամ խոսել է սերիալների «կործանարար» և վատ հետևանքների մասին, այնուամենայնիվ մեր հանգստի և ժամանցի հիմնական մասը սովորաբար լրացնում ենք հենց դրանցով:

Այսօր հանրության ուշադրության կենտրոնում է “Արմենիա” հեռուստաընկերությամբ հեռարձակվող «Հարազատ թշնամի» սերիալը: Սովորաբար առավել ուշագրավ են լինում սերիալների իգական սեռի գլխավոր դերակատարները, սակայն այսօր մեր ուշադրությանն է արժանացել «Հարազատ թշնամու» դերասան Արմեն Դալլաքյանը, ով սերիալի սիրահարներին ավելի ճանաչելի է Մաքս անունով:

Սա իհարկե Արմենի առաջին դերը չէ: «Սա իմ չորրորդ սերիալն է»,- պարզաբանեց նա: Ի տարբերություն շատ քաղաքացիների այն կարծիքի, թե սերիալների որակը գնալով ընկնում է, սցենարն էլ ճղճիմանում, Արմենը տեսնում է հակառակը. «Հայաստանում սերիալների որակը սկսել է բարձրանալ: Դե բանականաբար վարկանիշը չէր կարող միանգամից հասնել 100%, քանի որ ամեն ինչ աստիճանաբար է լինում: Ասեմ, որ այսօր կան շատ սերիալներ, որոնք չունեն վարկանիշ, ինչ վերաբերվում է մեր ֆիլմին, ես կարծում եմ, որ այն ստացված է»:

Արմենի այս խոսքերը վերաբերվում են նրան, որ ոչ բոլոր սերիալներն են պահանջված: Շատերի կարծիքով լավ և պրոֆեսիոնալ է այն դերասանը, ով կարողանում է տարբեր կերպարներ մարմնավորել և «տեղավորվել» այդ դերի մեջ: «Ես ու Մաքսը՝ սերիալի իմ կերպարը, շատ տարբեր ենք իրարից: Այդ իսկ պատճառով ինձ համար շատ բարդ էր մարմնավորել նրան, որովհետև նա իմը չէր, բայց ես կարողացա անել այն, ինչ հասանելի էր Մաքսին որպես կերպար: Անկեղծ ասած, սկզբում չէի հասկանում, թե իմ կերպարն ինչ է ուզում այս կյանքից: Ժամանակի ընթացքում հասկացա, որ նա մի մարդ է, ով ինչ մտածում, ասում է, ինչ ուզում, անում է, այսինքն՝ իր դեմ չկան խոչընդոտներ: Մաքսը հարուստ մի երիտասարդ է, ով ունի մեծ խիղճ»:

Արմեն Դալլաքյանն այն դերասաններից է, ով կարող է և պատրաստ է մարմնավորել ցանկացած կերպար: «Եթե մարդ ընտրում է այս մասնագիտությունը, ապա պետք է կատարի այն դերը, ինչն իրեն բաժին է ընկնում, ինչն իրեն հասանելի է: Պետք է անես այն, ինչ պահանջվում է դերասանության մեջ»,- ավելացրեց երիտասարդ դերասանը:

ArmStar.am-ի այն հարցին, թե երբևէ դերակատարման ժամանակ չի՞ սիրահարվել իր խաղընկերուհիներին, Արմենը պատասխանեց. «Սերիալից դուրս մենք լավ ընկերներ ենք, և հարազատ մարդիկ, նման բան ես ինձ թույլ չեմ տա»,- կարճ-կոնկրետ պատասխանեց զրուցակիցս: Խոսելով ապագայի իր պլանների մասին Արմենը գաղտնիքները չբացահայտեց. «Սպասեք անակնկալների, ավելին պատմել չեմ ուզում, միայն ասեմ, որ շատ շուտով հանրությանը կներկայացնեմ մեծ նախագիծ»:

Արմենն իր դերասանական փորձով «կիսվում է» նաև իր դերասանական ստուդիայի ուսանողների հետ, որը ստեղծվել է երկու տարի առաջ: «Նրանցից շատերն այսօր սովորում են թատերական ինստիտուտում: Ասեմ ավելին, ստուդիան զբաղվում է նաև ֆիլմարտադրությամբ, որի արդյունքը շատ շուտով կլինի մեծ էկրաններին»,- ավելացրեց Արմենը:

Զրուցեց Աշխեն Մնացականյանը/ ArmStar.am/