«Գազի գնի բարձրացումը կդառնա վարչախմբի տապալման սկիզբը». ակցիաներ

Այսօր՝ մայիսի 16-ին, Կառավարության շենքի մոտ բողոքի ակցիաներ են կազմակերպվել: Ակցիայի մասնակիցները պահանջում են չբարձրացնել գազի գինը:

«Գազի գնի բարձրացումը կդառնա վարչախմբի տապալման սկիզբը», «Ապահով Հայաստանում գազը թանկացնում եք, որ ի՞նչ անեք», «Գազը թանկացնեք, հարկերը չենք մուծելու», «Ինչքան ուզենք, այնքան ենք վճարելու» պաստառներով քաղաքացիներն իրենց բողոքն են ներկայացնում: Իրենց զորակցությունը և բողոքը եկան հայտնելու ՀՅԴ-ական պատգամավորներ Արմեն Ռուստամյանն ու Արծվիկ Մինաասյանը: 

Այստեղ են նաև Դավիթաշենի 4-րդ թաղամասի բնակիչները, ովքեր, ըստ իրենց խոսքի, խաբված բնակատերեր են: Նրանք նախապես վճարել են բնակարանների գնի 80%-ը, սակայն մի քանի տարի է, ինչ նրանց չի հանձնվում իրենց բնակարանները: Վերջիններս գնում են Արցախբանկ, քանի որ, ըստ իրենց, այդ բանկի պատճառով է առաջացել խնդիրը։

Իսկ գազի գնի թանկացման դեմ բողոքող քաղաքացիները որոշում կայացրին շարժվել դեպի նախագահական:

Այստեղ են նաև խաղաղ պայմաններում զոհված զինծառայողների մայրերը:

Կհաղորդվի լրացուցիչ տեղեկություն։