Օբամայի և նրա կնոջ կարողությունը կազմում է 1,9-6,9 միլիոն դոլար

ԱՄՆ-ի նախագահ Բարաք Օբաման ու նրա կինը 1,9-6,9 միլիոն դոլար կարողության տեր են։ Այդ մասին է փաստում ԱՄՆ-ի նախագահի և նրա տիկնոջ կարողության մասին հրապարակված հայտարարագիրը. փոխանցում է РИА Новости-ն։

Մի տարի առաջ ԱՄՆ-ի առաջին զույգի խնայողությունները կազմում էին 2,6-8,3 միլիոն դոլար։

Ինչպես վկայում է հաշվետվությունը, Օբամաների ունեցվածքի մեծ մասը՝ 1-5 մլն դոլար, կազմում են ֆինանսների նախարարության փոխառության տոմսերը: Բացի այդ, պետական արժեթղթերի վրա ներդրված է մոտ 100-250 հազար դոլար: JPMorgan Chase բանկում նախագահական զույգի հաշվում կա մոտավորապես 250-500 հազար դոլար: Բացի այդ, Օբամա ամուսիններն ունեն մոտ 100-250 հազար դոլարի կուտակում կենսաթոշակային ֆոնդում: 

Չնայած ունեցած խնայողություններին՝ Օբաման շարունակում է հիփոթեքային վարկ վճարել. նա 2005 թվականին 515 հազար դոլար գումար էր վերցրել 30 տարի ժամկետով։ Եվս 400 հազար դոլար գումար նախագահը պահում է իր երեխաների ուսման համար։

Անցած ամիս Սպիտակ տունը հայտնել էր, որ 2012 թվականին Օբաման ու նրա կինը վաստակել են մոտ 608 հազար դոլար, 172 հազար դոլար պակաս, քան 2011-ին։ Իսկ 2009 թվականին Օբամայի եկամուտները կազմել են 5.5 միլիոն դոլար։