Միջազգային իրավապաշտպանները քննադատել են Ադրբեջանին՝ զրպարտության օրենքի համար

Amnesty International-ի և ԵԱՀԿ-ի միջազգային իրավապաշտպանները քննադատել են Ադրբեջանին՝ խորհրդարանում զրպարտության մասին օրենքի ընդունման համար։ 

Պատգամավորները կողմ են եղել օրենքում լրացմանը, ըստ որի՝ համացանցում հրապարակված ցանկացած տիպի զրպարտություն դիտվելու է որպես դատապարտելի հանցանք՝ ենթակա ազատազրկման՝ մինչև 3 տարի ժամկետով։

Amnesty International-ն ու ԵԱՀԿ-ն ենթադրում են, որ օրենսդրության մեջ նման կարգի փոփոխությունները երկրում նախագահական ընտրություններից մեկ ամիս առաջ նպատակ ունեն սահմանափակել խոսքի ազատությունը երկրում։

Որպեսզի օրենքն իրավական ուժ ստանա, այն պետք է ստորագրի նախագահը։ Իլհամ Ալիևը դեռ չի ստորագրել փաստաթուղթը, բայց ենթադրվում է, որ նա կանի դա։