«Ազգ». Կառավարության շենքի առջև բողոքի ցույց՝ գազի թանկացման դեմ

Գազի բարձրացած գնի 30 տոկոսը կսուբսիդավորի կառավարությունը:

Կառավարության նիստը սկսելուց անմիջապես հետո վարչապետ Տիգրան Սարգսյանը հանդես եկավ հայտարարությամբ' «Հայռուսգազարդի» կողմից գազի գների բարձրացման վերաբերյալ հանրային ծառայությունները կարգավորող հանձնաժողով հայտ ներկայացնելու կապակցությամբ: Վարչապետը մասնավորապես հայտնեց, որ ինքը նամակ է հղել վերոնշյալ հանձնաժողովի նախագահին, որտեղ նշել է, որ կառավարությունը 30 տոկոսով սուբսիդավորելու է գազի գինը, ինչպես նաեւ աջակցություն է տրամադրվելու սոցիալապես անապահով խավերին: Տիգրան Սարգսյանը նաեւ նշեց, որ գազի գնի բարձրացման հայտի քննարկումները լինելու են բաց եւ թափանցիկ, որոնց կարող են մասնակցել բոլոր կուսակցությունների, հասարակական կազմակերպությունների ներկայացուցիչները:

Հիշեցնենք, որ ներկայումս բնակչության համար 1 խմ գազի գինը 132 դրամ է: «Հայռուսագազարդը» առաջարկում է այդ գինը բարձրացնել մինչեւ 221 դրամի: Եթե հանրային ծառայությունները կարգավորող հանձնաժողովը համաձայնություն տա գազի գինը վերոհիշյալ չափով բարձրացնելուն, ապա դրա 30 տոկոսը պետք է ֆինանսավորվի կառավարության կողմից: Այսինքն, այդ դեպքում բնակչության համար գազի գինը կդառնա 155 դրամ 1 խմ դիմաց, ինչը նշանակում է, որ գազի գինը կբարձրանա մոտ 18 տոկոսով կամ 23 դրամով:

Մինչ այդ կառավարության շենքի առջեւ գազի գնի բարձրացման դեմ բողոքում էին մեկ-ցուցարարները' «Ապահով Հայաստանում գազը թանկացնում եք, որ ի՞նչ անեք», «Մենք մեր ատոմակայանի հոսանքն ենք ուզում» եւ նմանատիպ այլ լոզունգներով: Նրանցից մեկը կոչ արեց նաեւ կառավարության շենքը հսկող ոստիկաններինՙ միանալ գազի թանկացման դեմ իրենց ձեռնարկած ստորագրահավաքին: