«Ազգ». Նալբանդյանն ու Մամեդյարովը այսօր կհանդիպեն

Հայաստանը ստանձնեց Եվրոպայի խորհրդի Նախարարների կոմիտեի նախագահությունը

Հայաստանի եւ Ադրբեջանի արտգործնախարարներն այսօր Կրակովում կհանդիպեն' տեւական ընդմիջումից հետո: Այդ մասին պաշտոնապես տեղեկացրել է Հայաստանի արտգործնախարարությունը:

Ըստ հաղորդագրությանՙ Հայաստանի ԱԳ նախարար Էդվարդ Նալբանդյանը այսօր կայցելի Կրակով' մասնակցելու Վիշեգրադյան քառյակի անդամ երկրների եւ ԵՄ Արեւելյան գործընկերության մասնակից պետությունների արտգործնախարարների հանդիպմանը:

Իսկ մինչ այդ Նալբանդյանը Ստրասբուրգում էր, որտեղ Հայաստանը երեկվանից ստանձնել է Եվրոպայի խորհրդի հիմնական որոշումներ կայացնող կառույցի' Նախարարների կոմիտեի նախագահությունը' վեց ամիս ժամկետով, այն ընդունելով Անդորրայից:

Նալբանդյանը Նախարարների կոմիտեում նախագահությունը ստանձնելիս հայտարարել է, որ Հայաստանի դիրքորոշմամբ պետք է երաշխավորել, որ անհատների իրավունքները պաշտպանվենՙ անկախ բնակության վայրի կարգավիճակից: Ըստ Նալբանդյանի ժողովրդավարությունը, մարդու իրավունքները եւ օրենքի գերակայությունը խթանելու եւ պաշտպանելու գործում Եվրոպայի խորհրդի գործունեության ազդեցության ամրապնդման համատեքստում «պետք է երաշխավորենք, որ անհատների իրավունքները պաշտպանվեն Եվրոպայի խորհրդի պատասխանատվության, ամբողջ տարածքումՙ անկախ այդ տարածքների կարգավիճակից, որտեղ նրանք բնակվում են»:

Կազմակերպությունը, ըստ Հայաստանի արտգործնախարարի, պետք է այդ միավորների հետ սերտ խորհրդակցությամբ դիտարկի կարգավիճակով չպայմանավորված մոտեցման հնարավորությունըՙ իր հիմնարար արժեքները եւ սկզբունքները խթանելու նպատակով:

Մինչ նախագահություն ստանձնելը Նալբանդյանը մայիսի 15-ին հանդիպել էր Եվրոպայի խորհրդի գլխավոր քարտուղար Թյորբյորն Յագլանդի հետ: Վերջինս հանդիպմանը նշել է, որ Հայաստանի նախագահությունը Եվրոպայի խորհրդի Նախարարների կոմիտեում լավ նախապատրաստված է, եւ կազմակերպության գործունեության տարբեր ուղղություններին առնչվող կարեւոր միջոցառումներ են նախատեսված, ինչի մասին նա համոզվել է դեռ ապրիլ ամսին Երեւան կատարած այցելության ժամանակ:

Էդվարդ Նալբանդյանը նշել է, որ ԵԽ-ին անդամակցությունից 12 տարի անց նման հեղինակավոր կազմակերպության նախագահությունը ստանձնելը լավ հնարավորություն է, մարտահրավեր, բայց նաեւ պատասխանատվություն: «Հնարավորություն, որովհետեւ Հայաստանը լինելու է առաջատար դիրքերում, առաջնորդելու է ԵԽ անդամ երկրների ջանքերըՙ ուղղված ժողովրդավարական Եվրոպայի զարգացմանը», ասել է Նալբանդյանը:

Նրա խոսքերովՙ նաեւ մարտահրավեր է, քանի որ եվրոպական աշխարհամասը այսօր բազմաթիվ մարտահրավերների առաջ է կանգնած, որոնք կարող են դժվարացնել ընդհանուր արժեքների ամրապնդումը եւ պատասխանատվությունը, քանի որ ԵԽ հաջողությունը կախված է ոչ միայն կազմակերպության յուրաքանչյուր անդամ երկրի ներդրած ջանքերից, այլ նաեւ այդ ջանքերի ճիշտ առաջնորդությունից:

«Հայաստանի նախագահության ընթացքում մեր լիակատար աջակցությունն ենք բերելու Եվրոխորհրդում նախաձեռնված բարեփոխումների գործընթացին: Նախագահության շրջանակներում նախատեսված են մի շարք կարեւոր միջոցառումներ Եվրոխորհրդի խորհրդարանական վեհաժողովի, անդամ երկրների խորհրդարանների, սահմանադրական դատարանների եւ խորհուրդների, տարածքային ինքնակառավարման մարմինների մակարդակներով, նաեւ այնպիսի ոլորտներում, ինչպիսիք են միջմշակութային, միջկրոնական երկխոսությունը, տեղական ժողովրդավարությունը, կրթությունը, երիտասարդական քաղաքականությունը: Հատուկ ուշադրություն է դարձվելու խտրականության, անհանդուրժողականության, այլատյացության դեմ պայքարին», ընդհանուր գծերով ներկայացրել է Նալբանդյանը:

Զրույցի ընթացքում ԵԽ գլխավոր քարտուղարի խնդրանքով Էդվարդ Նալբանդյանը ներկայացրել է ղարաբաղյան հիմնախնդրի խաղաղ կարգավորման ուղղությամբ Հայաստանի եւ միջազգային հանրության կողմից գործադրվող համատեղ ջանքերը: