«Ազգ». «Վարչապետ Էրդողանն ու նրա նախարարները կդատապարտվեն ցմահ բանտարկության»

Այս հայտարարությունը նախորդ օրը Թուրքիայի ազգային մեծ ժողովի լիագումար նիստում արել է «գորշ գայլերի» քաղաքական կազմակերպությանՙ Ազգայնական շարժում կուսակցության պատգամավոր Ջելալ Ադանը: Ինչպես երեկ նշել էր «Դունիա բուլթենի» կայքէջը, Ադանը հանդես է եկել սիրիական քաղաքականության առնչությամբ կառավարությանը Ժողովրդա-հանրապետական կուսակցության ներկայացրած հարցապնդման պաշտպանությամբ:

Ադանը ելույթում ասել է, որ Էրդողանը ջրհոր է ընկել Սիրիայում, ազատվելու համար օգնություն է խնդրում ԱՄՆ-ից: Նա անդրադարձել է նաեւ քրդական հարցի կարգավորման Էրդողանի կառավարության նախաձեռնությանը, մատնանշելով. «Երբ Թուրքիայում իշխանության գա արդարամիտ մի կուսակցություն, ապա վարչապետը, նախարարներն ու այլ պաշտոնյաներ ստիպված են լինելու իրենց կյանքի մնացած մասն անցկացնել բանտում: Այսքան հանցագործություն թերեւս չի իրագործվել ոչ մի ժամանակահատվածում»:

Ադանի այս խոսքերին արձագանքել է փոխվարչապետ Բեշիր Աթալայը. «Պարզապես զարմացած եմ: Մեջլիսն այն վայրը չէ, որ գործի դրվի զայրույթն ու ատելությունը: Այստեղ խուլիգանություն չեն անում, այլ առաջ են քաշում գաղափարներ: Ձեր խոսքերը անճարակության դրսեւորում են եւ մեր ժողովուրդը ձեզ երբեք իշխանության չի բերի»: