Մանրամասներ՝ Հրանտ Մաթևոսյանի եղբոր որդու սպանությունից

Հրանտ Մաթևոսյանի եղբոր՝ Համոյի որդուն՝ Թովմա Մաթևոսյանին դանակահարած տեսուչ Տիգրան Մելիքյանը դեպքից անմիջապես հետո դիմել է փախուստի, և իրավապահներին դեռևս չի հաջողվել հայտնաբերել վերջինիս: Դեպքի առթիվ Լոռու մարզի քննչական բաժնում հարուցվել է քրեական գործ՝ քրեական օրենսգրքի 104 հոդվածի հատկանիշներով' սպանություն: Դանակահարողի հանդեպ հայտարարվել է հետախուզում: Հիշեցնենք, որ մայիսի 15-ի ուշ երեկոյան Վանաձոր քաղաքի Բաղրամյան փողոցի վրա գտնվող «Գանձակ» սուպերմարկետի դիմաց դանակահարություն է տեղի ունեցել: Վիճաբանության կողմերն էլ բնապահպանության տեսուչն ու Մոտկորի անտառապետ Թովմա Մաթևոսյանն են եղել:

Պատճառների մասին դեռևս հիմնավոր վարկածներ չկան, սակայն երեկ «Հրապարակ»-ին հաջողվել է որոշ մանրամասներ ճշտել դեպքի առիթով: Մասնավորապես հաջողվել է պարզել, որ պարզել, որ վիճաբանությունը ծավալվել է երկու օր առաջ ոստիկանների կողմից առգրավված մեկ բեռնատար փայտի շուրջ: Անտառից ոչ օրինական ճանապարհով բեռնատարով փայտ են հանել, ինչն իրավապահների և տեսուչի կողմից հայտնաբերվել է: Ընդհանրապես, տեղացիների պատմելով, տեսուչն ու անտառապետը հաճախ են վիճել ապօրինի անտառահատումների և փայտը նույն' ապօրինի ճանապարհով անտառից տանելու թեմայով:

Եվ հերթական անգամ բացահայտված ծառահատման ու փայտի տեղափոխման գործընթացը հանգեցրել է վիճաբանության, ապաև՝ ողբերգության:

Տեսուչը երեկոյան զանգահարել է Մաթևոսյանին և կանչել զրուցելու: Մաթևոսյանը գնացել է ընկերների հետ, ովքեր, սակայն, մեքենայից չեն իջել: Անտառապետը միայնակ է գնացել, շատ կարճ խոսել է և իրեն հապճեպ գցելով մեքենան, ասել է. «Ինձ հասցրեք հիվանդանոց, էս բ-ի տղեն ինձ դանակահարեց»: Սակայն, քանի որ դանակն ուղիղ սրտի մեջ է խրված եղել, հիվանդանոց հասցրել են, բայց փրկել չի հաջողվել՝ անտառապետը մահացել է:

Իսկ տեսուչը շատ արագ նստել է մեքենա ու, հասկանալով, թե ինչ է տեղի ունեցել, միանգամից փախուստի է դիմել՝ հենց դեպքի վայրից անմիջապես մեկնելով Բագրատաշենի անցակետ: Հայտնի է, որ նա հատել է հայ-վրացական սահմանը, և այժմ հայտարարվել է հետախուզում: Ոստիկանությունում հույս ունեն, որ վրաց իրավապահները կձերբակալեն և Հայաստանին կհանձնեն նրան, եթե, իհարկե, նա արդեն չի լքել նաև Վրաստանը: Սպանություն կատարած անձը՝ Տիգրան Մելիքյանը, 37 տարեկան է, սպանվողը՝ 35:

«Հրապարակ»-ի տեղեկություններով, այս գործի քննության ընթացքը փորձում են ուղղորդել և տեսուչի վիճակը մեղմել:

Եվ սրանում որոշակի դերակատարում ունի Լոռվա բնապահպանական տեսչությունը, որի պետը բնապահպանության նախարար Արամ Հարությունյանի վարորդի եղբայրն է: Սպանվածն այլևս չի կարող ցուցմունք տալ և արդարանալ, իսկ սպանողի համար, փաստորեն, միջնորդողներ կան, որոնք նաև փորձում են տեսչության համար կատարվածից դիվիդենտներ շահել: