Անխուսափելի 40 տոկոս

Օրեր առաջ արդեն իսկ հայտնի դարձավ, որ գազի գնի թանկացումը, թերևս, անխուսափելի է։ «ՀայՌուսգազարդ» ՓԲԸ-ն և «ՀայՌուսգազարդ» ՓԲԸ «Տրանսգազ» ՍՊԸ-ն դիմել են ՀՀ հանրային ծառայությունները կարգավորող հանձնաժողով՝ գազի գնի փոփոխման վերաբերյալ առաջարկով։

Գործող սակագինը յուրաքանչյուր հազար նորմալ խորանարդ մետրի համար 132 000 դրամ է (ներառյալ ԱԱՀ), իսկ «ՀայՌուսգազարդ»-ը հանդես է եկել առաջարկով, որ գազի գինը նույնքան խորանարդ մետրի համար դառնա 221 000 դրամ։

Գազի թանկացմանը կհաջորդի շատ ու շատ ապրանքների և ծառայությունների թանկացումը։ Երեկ վարչապետ Տիգրան Սարգսյանը հայտարարեց, որ ՀՀ կառավարությունը 30%-ով սուբսիդավորելու է գազի սակագինը: ՀՀ հանրային ծառայությունները կարգավորող հանձնաժողովի նախագահ Ռոբերտ Նազարյանն էլ իր հերթին հայտարարեց, որ գազի գինը հաստատ բարձրանալու է։

«Սպառողների միություն» ՀԿ-ի նախագահ Արմեն Պողոսյանը Լուրեր.com-ի հետ զրույցում ասաց, որ այս թանկացումն անխուսափելի էր։

«Ես դա բարձրաձայնել եմ բազմաթիվ անգամ, որ գազի թանկացումն անխուսափելի է։ 180 դոլարով գազ գոյություն չունի։ Եվրոպայում հիմա միջին գները 300-ից բարձր են, և այդ խնդիրը լուծվում է Կրեմլում։ Սա արտաքին քաղաքականության ոլորտի խնդիր էր։ Մենք ունենք լուծման մի քանի եղանակ, դրանցից մեկը «ՀայՌուսգազարդում» մեր մասնաբաժնի ավելացումն է, իսկ մենք իրականում տեսնում ենք հակառակը։ Երբ որ ստեղծվեց «ՀայՌուսգազարդը», ՀՀ մասնաբաժինը 45 էր, հետո դարձավ 20, իսկ հիմա կան շատ լուրջ հիմքեր՝ կարծելու, որ այդ 20-ն էլ այլևս չկա, այսինքն՝ այդ թիվը նույնպես նվազել է։ Մեր պետության մեջ տնտեսական կարգապահությունը կաղում է»,-ասաց Արմեն Պողոսյանը։

Վերջինիս կարծիքով՝ գազի գնի բարձրացման վերջնական տոկոսը ոչ ոք չի կարող ասել, բայց կարծում է, որ փորձը ցույց է տալիս, որ բարձրացումը կլինի 40%-ի շրջանակներում։

Արմեն Պողոսյանի խոսքերով՝ թանկացման հետևանքով անմիջապես կմահանա ցեմենտի արտադրությունը։

«Կբարձրանա էլեկտրաէներգիայի գինը, և շղթայական ռեակցիայի կերպով մնացած բոլոր ապրանքները և ծառայություները ևս կթանկանան՝ տրանսպորտը, սնունդը և այլն, և այլն»,-ասաց Պողոսյանը։

ՀԿ նախագահը չի ընդունում կառավարության կողմից գազի սակագնի 30% սուբսիդավորումը:

«Ձգտել մարդկանց բեռը թեթևացնել՝ լավ է, բայց դա խնդրի լուծում չէ։ Մարդկանց մեջ մուրացիկի կերպար է ստեղծվում, իսկ դա վերջ ունի: Սուբսիդավորումը մշտական չի կարող լինել, կանցնի մի քանի ամիս, և կասեն, որ ավարտվեց այդ միջոցը, ու մարդիկ կընտելանան այս նոր գներին։ Իսկ կան ուրիշ եղանակներ. կա սակագինը դիֆերենցելու եղանակ, որը չի ընդունում մեր կառավարությունը, այսինքն՝ քիչ սպառողները այլ սակագնով վճարեն, շատ սպառողներն՝ ավելի բարձր. նույն գումարը վերաբաշխվի, հարուստներն ավելի շատ վճարեն, աղքատները՝ քիչ»,-ասաց Արմեն Պողոսյանը։