«Հազարան բլբուլ»-ը մոտենում է ավարտին

ՀՀ մշակույթի նախարարության և ՎիվաՍել-ՄՏՍ ընկերության աջակցությամբ «Մշակութային կրթության աջակցության» հիմնադրամը և «Առաջ, երեխաներ» կրթամշակութային հասարակական կազմակերպությունը՝ ս. թ. մայիսի 12-16-ը անցկացրել են «Հազարան բլբուլ» մանկապատանեկան երաժշտական բեմադրությունների հանրապետական 2-րդ մրցույթ-փառատոնի երկրորդ փուլը:

Մրցույթ-փառատոնի նպատակն է նպաստել երեխաների և պատանիների հոգևոր դաստիարակությանը և բազմակողմանի զարգացմանը (ծանոթություն երաժշտական թատրոնի, պարարվեստի, թատերարվեստի ժանրերին):

Մրցույթ-փառատոնի նախընտրական փուլը տեղի է ունեցել ՀՀ մարզերում՝ ս. թ. ապրիլի 20-ից մայիսի 9-ը: Հայաստանի Հանրապետության երաժշտական, արվեստի, հանրակրթական դպրոցների կողմից ներկայացված 24 մանկապատանեկան երաժշտական բեմադրություններից, որոնցում ընդգրկված էին 643 երեխա, նախընտրական փուլը հաղթահարել են 10-ը: Մրցույթ-փառատոնի 2-րդ փուլ անցած բեմադրությունները ս. թ. մայիսի 12-16-ը ցուցադրվել են մայրաքաղաքում՝ Համազգային, Հովհ. Թումանյանի անվան պետական տիկնիկային, Երևանի պետական կամերային երաժշտական թատրոններում: Մրցութային հանձնաժողովի կազմում ընդգրկված էին մշակույթի գծով Երևանի քաղաքապետի խորհրդական, բեմադրիչ Արամ Սուքիասյանը, Երևանի Կոմիտասի անվան պետական կոնսերվատորիայի պրոֆեսոր Կարինե Առաքելյանը, «Հազարան բլբուլ» մանկապատանեկան երաժշտական բեմադրությունների հանրապետական մրցույթ-փառատոնի հեղինակ և ղեկավար, «Առաջ, երեխաներ» կրթամշակութային ՀԿ նախագահ Նաիրա Ներսիսյանը, Երևանի պարարվեստի պետական քոլեջի պարուսույց Սրբուհի Բաբայանը և ՀՀ մշակույթի նախարարության աշխատակազմի ժամանակակից արվեստի վարչության գլխավոր մասնագետ, «Հազարան բլբուլ» մանկապատանեկան երաժշտական բեմադրությունների հանրապետական մրցույթ-փառատոնի պատասխանատու քարտուղար Լիլիա Նիկոյանը:

Մրցույթ-փառատոնի արդյունքները կամփոփվեն երկու գալա համերգին՝ ս. թ. հունիսի 1-ին, Գյումրու Վ. Աճեմյանի անվան պետական դրամատիկական թատրոնում և հունիսի 5-ին, Երևանի Հ. Պարոնյանի անվան երաժշտական կոմեդիայի պետական թատրոնում: Հաղթողներին կշնորհվեն «Գրան պրի», 1-ին, 2-րդ, 3-րդ մրցանակներ: