Իշխանական բազկաթոռը «գետնեց» Զարուհի Փոստանջյանին

Պարզվում է՝ Ազգային ժողովի նիստերից ոչ պակաս բոցաշունչ ընթացք են ունենում նաև ԱԺ հանձնաժողովների նիստերը: Այսօր Պետաիրավական հանձնաժողովի նիստում պատգամավորներն այն աստիճան էին աշխուժացել, որ Զարուհի Փոստանջյանը, ով հանձնաժողովի նախագահ Դավիթ Հարությունյանի հատուկ վերաբերմունքի օբյեկտն էր և հանձնաժողովի «կրակը», այն աստիճան ակտիվացավ ու սկսեց կաշվե բազկաթոռի վրա ոգևորված ճոճվել, շուռումուռ գալ, որ անգամ աթոռն էլ չկարողացավ դիմանալ ընդդիմադիր պատգամավորուհուն, կոտրվեց, թե տեղից դուրս եկավ ու երկու կես եղավ, Զարուհին էլ ընկավ ու ամբողջ մարմնով պառկեց գետնին:

- Էս հանձնաժողովը վերջը դառնալու ա հաշմանդամների հանձնաժողով,- բացականչեց հանձնաժողովի նախագահ Դավիթ Հարությունյանը, ով այդ օրը հազիվ էր կաղալով քայլում, ձեռքի միջնամատին էլ երկաթյա «զրահ» էր հագցրել:

- Դո՞ւք էլ եք ընկել:

- Հա, բայց ոչ աթոռից,- Հարությունյանի փոխարեն ծիծաղելով պատասխանեց հանձնաժողովի նիստին մասնակցող արդարադատության նախարար Հրայր Թովմասյանը: Դե, Հարությունյանը, ինչպես հայտնի է, նաև էքստրեմալ տուրիզմի, սրընթաց լեռնային գետերով նավարկությունների սիրահար է, այնպես որ, Աստված գիտե, թե նա որտեղից կարող էր ընկած լինել:

Քանի որ Զարուհուն ոչ մի բան չէր եղել, աշխուժացած մասնակիցներն ավելի էին աշխուժացել՝ սրտապնդվելով Փոստանջյանի՝ տեղի ունեցածի հանդեպ դրսևորած թեթև վերաբերմունքով: Իհարկե, բնական էր, որ ոստիկանների հետ երբեմն կենաց ու մահու կռիվներ մղած ու չոր ասֆալտին գետնված Փոստանջյանին Ազգային ժողովի գորգապատ հատակը չէ, որ կարող էր հանկարծ ու լացացնել: Չնայած, հենց այդ նիստի ժամանակ մեկ փորձ չէ, որ արվեց որոշ պատգամավորների կողմից՝ Զարուհու ընդդիմադիր ավյունը շիջելու համար: Չի կարելի բացառել, որ հենց այդ նեգատիվ էներգիան էլ, ի վերջո, անդրադարձավ բազկաթոռի ամբողջականության վրա:

Իսկ ամեն ինչ սկսվեց նրանից, երբ Փոստանջյանը նիստի օրակարգում ընդգրկված օրինագծերի քննարկման ժամանակ օրինակ բերեց «ՍԱՍ-ի Արտակի» կողմից կազմակերպված ընտրակեղծիքները: Պարզվեց՝ ՀՀԿ-ական պատգամավոր Հովհաննես Սահակյանի նրբին ականջների համար «ՍԱՍ-ի Արտակ» բառակապակցությունն անտանելի վիրավորանք է:

- Ես հասկանում եմ, որ Ձեր համար մեծ պատիվ է մեր կուսակցության անունը հնչեցնել, բայց կոչ կանեի կոռեկտության սահմաններում մնալ,- գործընկերոջ պատվի համար հերթական «դոշ տալու» գործընթացում հակադարձեց ՀՀԿ խմբակցության քարտուղարը:

- Բայց իրա խանութի անունը «ՍԱՍ» ա, հո ե՞ս չեմ էդ անունը դրել, կոռեկտության ի՞նչ հարց կա,- փորձեց արդարանալ Փոստանջյանը՝ այն դեպքում, երբ նույն պատգամավորը նիստի ժամանակ տեղի-անտեղի քրքջում էր կամ բարձր խոսում Փոստանջյանի կամ «Ժառանգության» մեկ այլ պատգամավոր Ռուբիկ Հակոբյանի ելույթների ու հարցադրումների ժամանակ՝ ակնհայտ անհարգալից վարք դրսևորելով գործընկերների նկատմամբ:

Իսկ երբ հերթը հասավ նրան, որ հերթական օրենսդրական փոփոխության հեղինակ Դավիթ Հարությունյանը պետք է ներկայացներ հերթական հարցը և նիստի նախագահությունը փոխանցվեց Էդմոն Մարուքյանին, նիստն ընդհանրապես վերածվեց խոսք ու զրույցի, կրքերն էլ՝ թեժացան:

Հազիվ էր Հարությունյանը հարցը ներկայացրել, երբ նիստը նախագահող Մարուքյանը վրա բերեց.

- Ես հարց ունեմ:

- Յա՜, բա մե՞նք, հլը մի հատ ասա հարցեր ունե՞նք, չունե՞նք, նոր,- առարկեց Գագիկ Ջհանգիրյանը:

- Էս ասա՝ դեմոկրատական դեսպոտիզմ ես հաստատել, էլի:

- Ա՛յ, սենց ա լինում, որ աթոռ են տալիս՝ հենց աթոռին նստում են, վե՛րջ, էլ ամեն ինչ մոռանում են, մենակ իրանք՝ իրանց,- սկսեցին բողոքել ներկաները:

Իսկ երբ արդեն հարցերն ավարտվեցին, նախագահողը միանգամից փորձեց «կարճ կապել».

- Լա՛վ, որ էլ հարցեր չկան, քվեարկենք:

- Ո՞ւր քվեարկենք, բա ելույթնե՞րը:

Էդմոն Մարուքյանի վարած նիստն էլ, դրա ընթացքում արձանագրված գերակտիվությունն էլ, ըստ էության, քանդեց Զարուհի Փոստանջյանի «տակը». հենց նման մի ասել-խոսելու, շուռումուռ գալու ժամանակ էլ հանկարծ ու լսվեց չարաբաստիկ դխկոցը՝ հսկայական կաշվե բազկաթոռը երկու կես եղավ մեջտեղից և ընդդիմադիր պատգամավորն ամբողջ մարմնով հայտնվեց գետնին:

- Ըհը՛, քո ձեռն աթոռն էլ չի դիմանում,- փոխանակ գործընկերոջը օգնության հասնելու՝ տեղից կանչեց քրքջացող Հովհաննես Սահակյանը:

Իհարկե, սա պատահականություն էր, իհարկե, նման բաները բոլորի հետ էլ կարող են պատահել, բայց, ինչպես տեսնում ենք, ՀՀ Ազգային ժողովի «իշխանական» բազկաթոռը տվյալ դեպքում կոտրվեց հենց միակ ընդդիմադիր պատգամավորի տակ, իսկ իշխանական պատգամավորներն ու նախարարը պինդ-պինդ մնացին իրենց աթոռներին նստած:

Լուսինե Կեսոյան