«Ռեալը» ձախողեց մրցաշրջանը, «Աթլետիկոն»՝ Իսպանիայի գավաթակիր (տեսանյութ)

Մադրիդի «Սանտյագո Բերնաբեու» մարզադաշտում «Ռեալը» և «Ատլետիկոն» վիճարկեցին Իսպանիայի գավաթը:

Հիմնական ժամանակի 90 րոպեների ընթացքում մադրիդյան թիմերը չպարզեցին հաղթողին՝ 1:1: Մեկնարկից 14 րոպե անց Կրիշտիանու Ռոնալդուն առաջ մղեց «Ռեալին»: Պատասխան գնդակը տեսնելու համար երկրպագուները ստիպված եղան սպասել 21 րոպե։ Այս անգամ աչքի ընկավ «Ատլետիկոյի» առաջատարներից Դիեգո Կոշտան:

Լրացուցիչ 30 րոպեներին ուժեղ գտնվեցին «Ատլետիկոյի» ֆուտբոլիստները։ Հանդիպման 99-րդ րոպեին Միրանդան խփեց իր թիմի հաղթական գոլը: Սա «Արքայական ակումբի»՝ գավաթի եզրափակիչներում կրած 4-րդ պարտությունն էր՝ սեփական հարկի տակ:

Հանդիպման վերջնամասը վերածվեց «պատերազմի»՝ «Ռեալի» պահեստայիններն ընդդեմ «Ատլետիկոյի» մարզչի և պահեստայինների:

Նշենք, որ «Ռեալը» 75-րդ րոպեին մնաց առանց գլխավոր մարզչի. Ժոզե Մոուրինյուն հեռացվեց խաղադաշտից: Իսկ 114-րդ րոպեին Մոուրինյուի օրինակին հետևեց և խաղադաշտից հեռացվեց Կրիշտիանու Ռոնալդուն: Կարմիր քարտից զերծ չմնաց նաև «Ատլետիկոն»։ 120–րդ րոպեին հեռացվեց Գաբին:

Բացի կարմիր քարտերից խաղի ընթացքում գրանցվեց նաև 12 դեղին քարտ:

Այս խաղից հետո պարզ դարձավ, որ «Ռեալը» վերջնականապես ձախողեց մրցաշրջանը՝ մնալով առանց որևէ մրցանակի, իսկ դա «Արքայական ակումբի» կարգի թիմի համար ուղղակի անթույլատրելի պետք է համարել։ Այս խաղը նաև պետք է «ուժգին ապտակ» համարել առաջին հերթին «Ռեալի» գլխավոր մարզիչ Ժոզե Մոուրինյուի համար. սա այն չէր, ինչ խոստացել էր Ժոզեն «Ռեալի» երկրպագուներին։