Վարչապետը՝ հանուն Դավիթ Սարգսյանի՞

- Սա իրականում Դավիթ Սարգսյանի օրենքն էր, բայց ոչ ոք գլխի չէր ընկել,- ժպտալով և աչքով անելով՝ վրա բերեց ԱԺ պետաիրավական հարցերի հանձնաժողովի նախագահ Դավիթ Հարությունյանը, երբ պատգամավորներ Արփինե Հովհաննիսյանն ու Հովհաննես Սահակյանը կատակելով հայտնեցին, թե առաջարկում են քննարկվելիք «Հանրային ծառայության մասին» ՀՀ օրենքում լրացում ու փոփոխություն անելու հարցին անուն տալ՝ «Վաչե Գաբրիելյան»:

Ինչպես հայտնի է, Վաչե Գաբրիելյանը վերջերս նշանակվեց կառավարության աշխատակազմի ղեկավար և հատուկ նրա համար այս պաշտոնին տրվեց նաև նախարարի ստատուս: Իսկ դա արդեն նշանակում էր՝ կառավարության կազմում գնալ կառուցվածքային փոփոխությունների և այդ ամենին նաև օրենսդրական հիմնավորում տալ: Հիշյալ օրենքի փոփոխությունը հենց այդ համատեքստում էր: Սակայն բանն այն է, որ մինչ օրս հիմնականում Վաչե Գաբրիելյանի անունն էր շոշափվում և ասվում, թե հանուն նրա էր, որ կառավարությունը նման քայլի գնաց:

Դատելով ամենքի մասին ամեն ինչ իմացող Դավիթ Հարությունյանի ռեպլիկից՝ ամեն ինչ, այդքան էլ, ըստ էության, միանշանակ չէ, և, փաստորեն, ինչպես լինում է սովորաբար, գլխավոր գործող անձը՝ այն մարդը, հանուն որի արվում են այս կամ այն քայլերը, մնացել էր ստվերում և, ինչպես պարզվում է, այդ հազվագյուտ կադրը, ում անպայմանորեն հարկավոր էր նախարարի պորտֆել շնորհել և հանուն որի արվեցին փոփոխություններ, իրականում դեռ Կենտրոնական բանկի տարիներից Տիգրան Սարգսյանի թիմի անդամ Դավիթ Սարգսյանն է եղել, այլ ոչ թե, ինչպես շատերն էին կարծում, ֆինանսների նախկին նախարար Վաչե Գաբրիելյանը, ում, հանուն Դավիթ Սարգսյանի նախարարության, էլի փորձեցին չնեղացնել:

Լուսինե Կեսոյան