Քննարկվում են նոր տեխնոլոգիաների ներդրման հարցեր

Մայիսի 17-ին ԱԻ նախարար Ա. Երիցյանը այցելել էր Կոտայքի մարզի Աբովյան քաղաքում գտնվող «Ռոստելեկոմ» ԲԲԸ-ի գրասենյակ՝ մասնակցելու ՀՀ ԱԻՆ համար նոր տեխնոլոգիաների ներկայացմանն ու «Սոս Սիսթեմս» հակահրդեհային ահազանգման ու ազդարարման համակարգի փորձարկմանը:

Սկզբում նախարար Ա. Երիցյանն այցելեց «Ռոստելեկոմի» սերվերային կենտրոն, ծանոթացավ ընկերության աշխատանքին, ինչից հետո ընկերության մասնագետները ԱԻ նախարարին ներկայացրեցին երեք նոր համակարգերի աշխատանքը, որոնք նախատեսվում է գնել ՀՀ ԱԻՆ-ի համար' նախարարարության աշխատանքն ավելի արդյունավետ դարձնելու և կատարելագործելու համար:

Ներկայացվող համակարգերից առաջինը փակ ընդհանուր գերատեսչական կապն է ՀՀ ավելի քան 70 համայնքների միջև, որը թույլ կտա աղետի դեպքում ավելի արագ իրազեկել Հայաստանի բնակչությանը վտանգի մասին: «Ռոստելեկոմի» ներկայացուցիչը նշեց, որ դա հուսալի և որակյալ կապ կապահովի ՀՀ ամբողջ տարածքում: Նա ավելացրեց նաև, որ հնարավորություն կա դպրոցների և մանկապարտեզների տնօրեններին բջջային հաղորդագրությունների միջոցով իրազեկել աղետի մասին:

Հաջորդ համակարգը ներքին հեռախոսակապն է ԱԻ նախարարության համար: Այն կապահովի անխափան և անվճար կապ ԱԻՆ գերատեսչությունների միջև:

Համակարգերից երրորդը վիդեոկոնֆերանս կապ ապահովող ծրագիրն է: Այն թույլ է տալիս հեռավորության վրա գտնվող անձանց միասին խորհրդակցություն անցկացնել: Նախատեսվում է այդ համակարգը տեղադրել ՀՀ բոլոր մարզերում: Դրա շնորհիվ հնարավոր կլինի ամենահրատապ խնդիրների շուրջ խորհրդակցություն անցկացնել մարզպետերի հետ՝ առանց ժամանակ կորցնելու և նախարարության կամ մարզպետարանի շենքից դուրս գալու: ԱԻ նախարարը նշեց, որ արդեն նախնակական պայմանավորվածություն է ձեռք բերվել մարզպետերի հետ' համակարգը տեղադրելու վերաբերյալ:

Վեդեոկոնֆերանս կապի համակարգը նույնպես տեղում փորձարկվեց և մասնակիցները կապվեցին ՀՀ ԱԻՆ ճգնաժամային կառավարման կենտրոնի, Ռուսաստանի Դաշնության ԱԻ նախարարության, ինչպես նաև «Ռոստելեկոմի» ռուսաստանյան գրասենյակի ներկայացուցչի հետ: Վերջինս ավելի մանրամասն պատմեց համակարգի մասին՝ նշելով, որ վիդեոկոնֆերանսին կարող է միանալ մինչև հիսուն մասնակից: Հնարավորություն կա այն ձայնագրել և տեքստային հաղորդագրություններ ուղարկել վիդեոկոնֆերանսի ընթացքում:

Հանդիպման ընթացքում «ՍՕՍ ՍԻՍԹԵՄՍ» ընկերության մասնագետը զեկույց կարդաց 2012 թ. Հայաստանում ներդրված հակահրդեհային շուրջօրյա մոնիթորինգային համակարգի աշխատանքի վերաբերյալ: Զեկույցից հետո վերջինս խոսեց արտակարգ իրավիճակների իրազեկման մեթոդների մասին և ներկայացրեց «ՍՕՍ կոճակ» համակարգի տարբերակները՝ առաջարկելով գնել այն ԱԻ նախարարության համար: «ՍՕՍ կոճակը» հնարավոր է տեղադրել վերելակներում, մետրոներում, մայրուղիներում և անգամ սմարթֆոնների հավելվածներում: Այն արտակարգ իրավիճակի դեպքում հնարավորություն է տալիս տուժածին ուղիղ կապ հաստատել ԱԻՆ «911» արագ արձագանքման ծառայության հետ: Ի դեպ, ընկերության ներկայացուցիչը խոստացավ սմարթֆոնների հավելվածներում համակարգն անվճար տեղադրել:

Վերջում ԱԻ նախարար Ա. Երիցյանը, շնորհակալություն հայտնելով ընկերությունների ներկայացուցիչներին, մասնավորապես ասաց.
- Մենք պատրաստ ենք համագործակցել, քանի ազդարարման համակարգերն այսօր շատ կարևոր են բնակչության անվտանգությունն ապահովելու համար:

Հանդիպման ավարտին կողմերի միջև պայմանավորվածություն ձեռք բերվեց, համագործակցության շրջանակներում, հետագա հանդիպումների ընթացքում ավելի մանրամասն ծանոթանալ ներկայացված համակարգերի աշխատանքին և քննարկել դրանց տեղադրման և կիրառման հետ կապված հարցերը: