Բողոքի ակցիա՝ Կառավարության շենքի մոտ (թարմացված)

ՀՀ կառավարության շենքի մոտ այս պահին հավաքվել են ՀՀ զինված ուժերում զոհված զինծառայողների մայրերը և մի քանի տասնյակ քաղաքացիներ, ինչպես նաև «Բանակն իրականում» նախաձեռնության անդամներ: Մասնակիցները սև ժապավեն և սպիտակ մեխակներ են  կապել ծառերից: Նշենք, որ մարդկանց թիվը գնալով ավելանում է:

Քիչ առաջ ոստիկանության ՊՊԾ պետ Վալերի Օսիպյանը հայտարարեց, որ ակցիան անօրինական է, և պահանջեց դադարեցնել ակցիան: Հայտարարությունն ակցիայի մասնակիցների մոտ զայրույթ առաջացրեց, որի պատճառով ճեղքեցին ոստիկանների ստեղծած պատը, առաջ շարժվեցին դեպի Կառավարության շենք: Այնուհետև սկսեցին խփել շենքի դռներին՝ պահանջելով հանդիպում վարչապետի հետ: Ոստիկանների թիվը ևս լրացվում է:

Կառավարության շենքի դիմաց հավաքվածներին մոտեցավ կառավարության քաղաքացիների ընդունելության և դիմումների քննարկման վարչության պետ Ալեքսանդր Ղազարյանը, սակայն հավաքվածները նրանից պահանջեցին, որ իրենց ընդունի վարչապետը: Ակցիայի մասնակիցները փորձում են ներս մտնել Կառավարության շենք:

Հիշեցնենք, որ երկու օր առաջ Նոյեմբերյանում գտնվող ՊՆ N զորամասում ծառայակցի արձակած գնդակից զոհված Մարտունիի Վերին Գետաշեն գյուղի բնակիչ, 1994թ. ծնված զինծառայող Լյուքս Ստեփանյանի հայրը, ի նշան որդու հետ կատարվածի դեմ բողոքի, որոշել էր որդու դին դագաղով բերել Երևան և բողոքի միջոցառում անցկացնել Կառավարության շենքի դիմաց, սակայն ՊՆ նախարար Սեյրան Օհանյանի և ՀՀ ոստիկանության պետ Վլադիմիր Գասպարյանի հետ բանակցություններից հետո ծնողները համաձայնվել են ճանապարհի կեսից ետ տանել իրենց որդու դին: