Սպանված զինվորին հուղարկավորեցին

Քիչ առաջ Նոյեմբերյանի զորամասում սպանված Լյուքս Ստեփանյանի դին հողին հանձնեցին Գեղարքունիքի մարզի Վերին Գետաշեն գյուղում:

Ինչպես նախապես հայտարարվեց, հուղարկավորությանը մասնակցեցին նաև ՀՀ պաշտպանության նախարար Սեյրան Օհանյանը և ոստիկանապետ Վլադիմիր Գասպարյանը:

Հիշեցնենք, որ երկու օր առաջ Նոյեմբերյանում գտնվող ՊՆ N զորամասում ծառայակցի արձակած գնդակից զոհված Մարտունիի Վերին Գետաշեն գյուղի բնակիչ, 1994թ. ծնված զինծառայող Լյուքս Ստեփանյանի հայրը, որոշել է ի նշան որդու հետ կատարվածի դեմ բողոքի որդու դին դագաղով բերել Երևան և բողոքի միջոցառում անցկացնել Կառավարության շենքի դիմաց։

Այնուհետև Պաշտպանության նախարար Սեյրան Օհանյանի և Վլադիմիր Գասպարյանի հետ մոտ 1 ժամ բանակցություններից հետո Լյուքս Ստեփանյանի ծնողները համաձայնվեցին ետ տանել իրենց որդու դին: Նշենք, որ Սեյրան Օհանյանը ինչպես տղայի հարազատներին, այնպես էլ լրագրողներին խոստացել է, որ կատարվածի համար բոլոր մեղավորները խստորեն պատժվելու են: 

Նշենք, որ մի շարք քաղաքացիական ակտիվիստների կողմից բողոքի ակցիան շարունակվեց ՀՀ Կառավարության շենքի մոտ: