Ջրի եվրոպական երիտասարդական 11-րդ պառլամենտն ավարտեց աշխատանքները

Հասարակություն 19 Մայիս, 2013 4:03

Մայիսի 18-ին Ազգային ժողովում տեղի ունեցավ Ջրի Եվրոպական երիտասարդական 11-րդ պառլամենտի նիստի փակման արարողությունը:

Ջրի եվրոպական երիտասարդական 11-րդ պառլամենտի Հայաստանի համակարգող Հասմիկ Հարությունյանը ներկայացրեց, թե ինչ աշխատանքներ են իրականացրել երիտասարդական պառլամենտի անդամները մեկ շաբաթվա ընթացքում: Նախագահ Ֆիլիպ Հանդերսոնը շնորհակալություն հայտնելով երիտասարդ խորհրդարանականներին՝ կարեւորեց նրանց աշխատանքը ջրի հիմնախնդիրների ուսումնասիրման ոլորտում: Փոխնախագահներ Դիմկա Դելչեւան եւ Աննա Կալաշովան շնորհակալություն հայտնեցին կազմակերպիչներին՝ նշելով, որ լինելով Հայաստանում, հնարավորություն ստացան ավելի խորը ուսումնասիրելու ջրի հիմնախնդիրները: Նրանք մեկ շաբաթվա ընթացքում այցելել են Հայաստանի տեսարժան վայրերը, ծանոթացել նոր մարդկանց հետ եւ համոզվել, որ համատեղ աշխատանքի դեպքում անլուծելի խնդիրներ չկան: Այնուհետեւ ձեւավորված հանձնաժողովը ներկայացրեց հռչակագիրը, որը հաստատվեց ձայների մեծամասնությամբ: Երիտասարդ խորհրդարանականները նշեցին, որ Երեւանում եւ Սեւանում քննարկել են ջրի հիմնախնդիրներին վերաբերող բազմաթիվ հարցեր: Նրանք շնորհակալություն հայտնեցին Ազգային ժողովի նախագահ Հովիկ Աբրահամյանին խորհրդարանի աշխատանքներին աջակցելու համար:

Մասնակից 15 երկրների ներկայացուցիչները ներկայացրին իրենց առաջարկները ջրային ռեսուրսների կառավարման ոլորտում:

Ջրային տնտեսության պետական կոմիտեի նախագահ Անդրանիկ Անդրեասյանը Ջրի երիտասարդական պառլամենտի հայկական պատվիրակությունից ստանալով ընդունված հռչակագիրը՝ վսահեցրեց, որ հայկական կողմն այն իրագործելու է ամբողջությամբ:

Ժյուրիի կողմից մրցանակներ հանձնվեցին տեսաերիզների եւ լուսանկարների մրցույթներում հաղթողներին, նաեւ բոլոր մասնակիցները ստացան հավաստագրեր:

«Հայջրմուղկոյուղի» ՓԲԸ-ի գլխավոր տնօրեն եւ ՍԱՈՒՂ պայմանագրի կառավարիչ Պատրիկ Լորենը շնորհակալություն հայտնեց խորհրդարանի ղեկավարությանը հյուրընկալության համար, նշեց, որ այս աջակցությունը վկայում է ջրի հիմնահարցի նկատմամբ Հայաստանի իշխանությունների ուշադրության մասին:

Սպառելով մեկշաբաթյա ծրագրի օրակարգը՝ Ջրի եվրոպական երիտասարդական 11-րդ պառլամենտը ավարտեց աշխատանքը: