Քրիստինեին ճանաչում բերեց Արևիկի կերպարը

Դերասանուհի լինելն ու այս մասնագիտությամբ աշխատելը նախևառաջ պահանջում է շնորհք և հմտություններ: Շատ օրինակներ կարելի է նշել, երբ դերասանն առանց համապատասխան կրթություն ունենալու կարողացել է լավագույնս կերտել տարբեր կերպարներ: Իհարկե դերասանական վարպետություն սովորելը լավ է, բեմական խոսքի արվեստին տիրապետելը՝ պարտադիր, բայց այս ամենը հնարավոր է ձեռք բերել նաև փորձի ընթացքում, ինչպես դա արել է ArmStar.am-ի այսօրվա զրուցակիցը:

Դերասանուհի Քրիստինե Կարապետյանը սովորում է Մշակույթի պետական քոլեջի վոկալ բաժնում, որպես մասնագիտություն ընտրել է հագուստի դիզայնի մոդելավորումը, սակայն չի պատրաստվում այսքանով սահմանափակվել: “Դերասանական առաջին քայլս եղել է 7 տարեկանում, երբ մասնակցում էի ՈւՀԱ-ի դպրոցական լիգային: Նկարահանվել եմ մի շարք գովազդային հոլովակներում և տեսահոլովակներում”: Քրիստինեն իր երկրպագուներին և հանդիսատեսին ավելի ծանոթ է “Արևիկ” անվամբ, ինչը “վաստակել է” “Աննա” հեռուստասերիալում նկարահանվելու արդյունքում:

“Տասնինը տարեկանում նկարահանվեցի “Աննա” հեռուստանովելում, որտեղ մարմնավորեցի Արևիկի կերպարը: Այնուհետև նկարահանվեցի “Հրեշտակների դպրոցը” և “Գեներալի աղջիկը” հեռուստանովելներում”:

Այս բոլոր սերիալներից ամենաշատը Քրիստինեին հաջողություն ու ճանաչում բերեց “Աննա” հեռուստասերիալի Արևիկի կերպարը: Հիմա անգամ շատերը նրան փողոցում տեսնելիս ուրախ բացականչում են. “Վա՜յ, Արևիկը”: “Արևիկի կերպարն ինձ համար շատ կարևոր էր: Գործընկերներիս ու հանդիսատեսի ջերմ ընդունելության շնորհիվ էր, որ կերպարը դարձավ իմը և մինչ օրս էլ ինձնից անբաժան է”:

Քրիստինեի կարծիքով սերիալների նկարահանումներն իրեն բավականաչափ օգնել են փորձի և կայացման առումով: “Նկարահանման հրապարակում շատ բան կարելի է սովորել պրոֆեսիոնալներից”,-ավելացրեց Քրիստինեն:

Նա, ինչպիսին որ նկարահանման հրապարակում է, այնպիսին էլ կյանքում է՝ ուրախ և անմիջական: Հայտնիության և ճանաչված լինելու հետ կապված՝ Քրիստինեն ասաց, որ իրեն ճանաչված է համարում այնքան, որքան իր հեռուստադիտողը: “Ի վերջո ինձ համար կարևորը հայտնի և ճանաչված լինելը չէ, կարևորն այն է, որ որ գործդ հաճույքով կատարես”,- ավելացրեց Քրիստինեն:

Զրուցեց Աշխեն Մնացականյանը/ArmStar.am/