Մի լուսանկարի պատմություն. Մեր բակը 2-ից

Բոլորը կհիշեն հայտնի «Մեր բակ»-ը, որը երևանցու կյանքի մի մասն էր՝ իր մանր ներքին ինտրիգներով, փողոցային վեճերով, սիրային պատմություններով և անկրկնելի բարությամբ:

ArmStar.am-ը շարունակում է ներկայացնել «Մի լուսանկարի պատմություն" շարքը. այս անգամ մեր լուսանկարի հերոսները «Մեր բակը 2» ֆիլմից են: Արմեն Թադևոսյանը ֆիլմում ավազակի դեր էր տանում, իսկ Մարկ Սաղաթելյանը գյուղից քաղաք եկած բարեկամի կերպարում էր:

Լուսանկարը ցույց տվեցինք երկուսին էլ, բայց նրանցից միայն մեկը մտաբերեց լուսանկարի պատմությունը.«Ցավոք չեմ հիշում, ճիշտ կլինի Արմեն Թադևոսյանին հարցնենք», -նշեց Մարկ Սաղաթելյանը:

Իսկ Արմենը, ով հանդիսանում էր նաև «Մեր բակ 1»-ի և «Մեր բան 2»-ի ֆիլմերի սցենարիստներից, պատմեց հետևյալը.«Այս լուսանկարն արվել է 1997 թվականին, երբ մենք նկարում էինք «Մեր բակ 2» ֆիլմը: Եթե հիշում եք կար մի տեսարան, որտեղ Հրանտն ու Իրինան ամուսնանում էին, այս լուսանկարն այդ դրվագից է: Այդ տեսարանում ներկա էին ֆիլմի բոլոր հերոսները, որտեղ էլ արվեց այս լուսանկարը»:

Արմենը չհիշեց լուսանկարի հեղինակին, բայց ինչպես նա էր ասում, բացի տեսախցիկներից նկարահանման վայրում կար նաև լուսանկարիչ, ով էլ հավանաբար լուսանկարել է նրանց:

«Մեր բակ 2»-ում իր և Մարկի մարմնավորած կերպարների մասին Արմենը հիշեց.«Ֆիլմում կար մի եռյակ, ովքեր աղջիկներ էին փախցնում, դա ես էի՝ Վիցին դերում, Կարեն Ղազարյանը՝ Մորգունովի կերպարում, իսկ Հայկ Մարությանն էլ Նիկուլինին էր մարմնավորում: Մեր կարպարները հայտնի ֆիլմից էր վերցրած և քանի որ նույն այդ ֆիլմում Վիցինը նման շորերով էր, իմ կերպարն էլ այդպես ընտրվեց: Իսկ Մարկը և Արամոն մարմնավորում էին գյուղից քաղաք երկած բարեկամներին, նրանց կերպարներն էլ վերցրած էր «Տղամարդիկ» հայտնի ֆիլմից», հիշում է Արմեն Թադևոսյանը:

Հիշողությունները հավաքեց՝ Սիրանուշ Գրիգորյանը/ ArmStar.am/