Կարո՞ղ է հակակարկտային կայանները մայիսի 5-ի հանրապետական հրավառությա՞նն են մասնակցել

Այսօր սկսվեցին ՀՀ ԱԺ 5-րդ գումարման երրորդ նստաշրջանի չորսօրյա նիստերի աշխատանքները:

ՀՀ վարչապետ Տիգրան Սարգսյանն այսօր ԱԺ-ում ներկայացրեց կառավարության նոր ծրագիրը:

ՀԱԿ պատգամավոր Նիկոլ Փաշինյանն անդրադարձավ կարկուտի հասցրած վնասներին և հարցրեց Տիգրան Սարգսյանին. «Ինչպե՞ս է պատահել, որ Արմավիրի մարզի 105 հակակարկտային կայանները, կներեք այս արտայատությանս համար, «փուստ են տվել»: Դառնացած գյուղացիները, որոնցից մի քանիսի անունը չեմ կարող ասել, նույնիսկ զավեշտի են վերածել այդ պատմությունը, և գյուղացիներից մեկն ինձ հարցնում էր. «Կարո՞ղ է այդ հակակարկտային կայանները մայիսի 5-ի գիշերվա հանրապետական հրավառությանն են մասնակցել»,- հրավառությունը Երևանի քաղաքապետի ընտրությունների առիթով էր»:

Տիգրան Սարգսյանը, պատասխանելով Փաշինյանի հարցին, պատասխանեց. «Ես առաջարկում եմ, որ մենք լսենք մասնագետների կարծիքը: Հասկանալի է, որ 43 համայնքներում շոշափելի և էական վնաս է հասցրել կարկուտը, և պետությունը պարտավոր է օգնության ձեռք մեկնել այդ մարդկանց և առաջին հերթին սոցիալապես անապահով ընտանիքների, բայց հիմա տարածել այնպիսի տրամադրությւոններ, որ եթե հակակարկտային կայաններ են տեղադրված, նշանակում է, որ մենք 100 տոկոսով երաշխավորում ենք, որ կարկուտը վնաս չի պատճառել, այդպիսի բան չկա: Աշխարհում չկա, և չի էլ կարող լինել Հայաստանում: Հակակարկտային կայաններն ընդամենը նվազեցնում են վնասի աստիճանը»,-ասաց վարչապետը:

«Ես պնդում եմ ասել, որ ձեր կառավարությունը չի օգնելու գյուղացիներին, որովհետև դա Ձեր կառավարության բնույթն է»,-արձագանքելով Տիգրան Սարգսյանի պատասխանին՝ ասաց Նիկոլ Փաշինյանը:

Գործադրի ղեկավարը, պատասխանելով պնդմանը, ասաց. «Պարո՛ն Փաշինյան, ձեր բնույթն է և ձեր ոճն է չտեսնել ոչ մի կատարված աշխատանք»: