Թվում է` այնքան հեշտ է գազ մատակարարել Հայաստան. Տիգրան Սարգսյան

Երբեմն թվում է` այնքան հեշտ է գազ մատակարարել Հայաստան: Մեր երկրի համար այս խնդիրը լուծելը հեշտ չէ, և այս խնդրի լուծումն իր մեջ պարունակում է բազմաթիվ գործոններ: Այս մասին այսօր Ազգային ժողովում հայտարարեց ՀՀ վարչապետ Տիգրան Սարգսյանը` պատասխանելով Խաչատուր Քոքոբելյանի այն հարցին, թե ինչու Հայաստան գազ չի մատակարարվում Իրանից:

«Այսօր կառավարությունն օգտագործում է իր բոլոր լծակները, որպեսզի այն գազը, որ մատակարարվում է Հայաստան, լինի առավել ցածր գներով: Ես ձեզ հավաստիացնում եմ, որ մենք դրա համար անում ենք ամեն ինչ` սկսած մեր հարաբերություններով Իրանի Իսլամական Հանրապետության հետ, ավարտված մեր ռազմավարական գործընկերոջ հետ: Այսօր քաղաքական ամենաբարձր մակարդակով բանակցություններ են գնում Ռուսաստանում, որի նպատակն է գտնել այնպիսի լուծումներ, որոնք թույլ կտան մեզ նվազեցնել կամ սուբսիդավորել գազի գինը: Մենք մտադիր ենք սահմանի վրա ֆիքսված գինը երեսուն տոկոսով նվազեցնել, և նվազեցման այդ մեխանիզմները մենք կներկայացնենք Ձեր դատին, երբ կստորագրենք Ռուսաստանի հետ պայմանագիր, որը վերաբերելու է հենց այս խնդրի լուծմանը», -ասաց Տիգրան Սարգսյանը: