«Իրենք խաբող են, իրենք քցող են»

Ազգային ժողովի այսօրվա նիստում վարչապետ Տիգրան Սարգսյանը ներկայացրեց կառավարության ծրագիրը:

Քննարկման ժամանակ վարչապետին հարց ուղղեց «Ժառանգություն» խմբակցության քարտուղար Զարուհի Փոստանջյանը։

«Ասացիք, որ հեղափոխությունը չպետք է տեղի ունենա փողոցներում, բայց ուզում եմ ասել, որ դա արդեն իսկ փաստ է, որ ՀՀ-ում փողոց են դուրս գալիս մարդիկ իրենց պահանջներով, քանի որ կառավարությունը և այլ պատկան մարմիններ խնդիրներին լուծում չեն տալիս: Այս պահին փակված է Արմավիրից Երևան եկող ճանապարհը, գյուղացիները բողոքում են կարկտահարության հետևանքով իրենց կրած վնասներից և կառավարությունից պահանջում են հստակ գումարային փոխհատուցում: Սա իրենց պատկերացրած լուծումն է:

Երկու օր առաջ նման մի փաստ արձանագրվեց Երևան-Սևան մայրուղում, այս անգամ ոչ թե քաղաքացիներն էին փակել ճանապարհը, այլ Ոստիկանության և ՊՆ-ի աշխատակիցները: Հենց նույն օրը փակվել էին նաև կառավարության շենքի մուտքերը ոստիկանության ուժերի կողմից, և բողոքավոր քաղաքացիները ձեզանից հաշվետվություն էին ցանկանում լսել, թե ինչու են փակվում Հայաստանում ճանապարհները: 

Ես կարծում եմ, որ դուք այստեղ ելույթ ունենալուց անկեղծ չեք: Մենք երկար ժամանակ անցանք և տեսանք, որ այն 5 տարին, որ դուք պաշտոնավարեցիք, ձախողված տարիներ էին բոլորիս համար: Այս պահին կա նաև Փակ շուկայի խնդիրը, դուք ոչ մի խնդրին լուծում չեք տվել և անկեղծ չեք, իսկ ժողովրդի լեզվով ասած «իրենք խաբող են, իրենք քցող են»,-հարցրեց Փոստանջյանը:

Վերջինիս ի պատասխան՝ Տիգրան Սարգսյանն ասաց. «Երբևիցե Ձեզ մենք չենք խաբել: Անկեղծության դրսևորումը չափազանց կարևոր է, բայց ես չեմ ընդունում Ձեր անկեղծությունը և անկեղծության դրսևորումները, որոնք ուղղակի նպատակաուղղված են վիրավորանքներ հասցնելուն: Այդպիսի անկեղծություն մեզ պետք չէ:

Արմավիրի մարզի կարկտահարված համայնքների բնակչության դժգոհության վերաբերյալ ասեմ, որ առաջին օրվանից մենք այդ հարցով զբաղվում ենք, արդյուքում՝ տրվել են հստակ հանձնարարականներ: Եթե խոսքը գնում է փոխհատուցման մասին, ապա փոխհատուցում չի լինելու»,-ասաց Տիգրան Սարգսյանը:

Վերջինս, խոսելով Երևան-Սևան մայրուղում տեղի ունեցածի վերաբերյալ, ասաց, որ ոստիկանությունը գործել է օրենքի սահմաններում: