«Տոնուս»-ից տուժած քաղաքացիները փակեցին փոխնախարարի մեքենայի ճանապարհը (տեսանյութ)

Ինչպես արդեն Lurer.com-ը տեղեկացրել էր, այսօր առավոտյան Ֆինանսների նախարարության շենքի մոտ էին հավաքվել Դավիթաշենի 2-րդ թաղամասի և Փափազյան 118 շենքի բնակիչները՝ պահանջելով իրենց տրամադրել օրինական ճանապարհով «Տոնուս» ՍՊԸ–ից ձեռք բերած բնակարանները։ 2006 թվականից 140 ընտանիք «Տոնուս Քոնսթրաքշնս» ՍՊԸ–ի հետ կնքել են անշարժ գույքի առքուվաճառքի նախնական պայմանագիր, կատարել պարբերական վճարումներ վերը նշված բազմաբնակարան շենքում բնակարան ձեռք բերելու նպատակով: Սակայն վերջերս բնակիչներին հայտարարել են, որ իրենք բնակարանների նկատմամբ իրավունքներ չունեն, քանի որ շենքը գրավ է դրված «ԱՐՑԱԽԲԱՆԿ» ՓԲԸ-ում։

Քաղաքացիները նախապես պայմանավորվել էին հանդիպել Ֆինանսների նորանշանակ նախարար Դավիթ Սարգսյանի հետ, եկել էին Ֆիննախ հենց այդ հույսով, սակայն տեղեկացել, որ նախարարը տեղում չէ։ 

Այնուհետև շենքից դուրս եկավ Ֆինանսների փոխնախարար Վարդան Արամյանը, ով շտապում էր ԱԺ։ Քաղաքացիները, տեսնելով փոխնախարարին, կանգնեցին նրա մեքենայի առջև ու թույլ չտվեցին հեռանալ՝ պահանջելով լսել իրենց բողոքը։ Վարդան Արամյանը խոստացավ անպայման ուսումնասիրել խնդիրը և քաղաքացիների բողոքը ներկայացնել նախարարին։ Վերջապես նա կարողացավ համոզել քաղաքացիներին բացել մեքենայի ճանապարհը և հեռացավ։

Ակցիայի մասնակիցները հայտարարեցին, որ չեն լքի շենքի տարածքը, մինչև իրենց չլսեն, քանի որ նրանք անտեղի չէին եկել, այլ նախապես պայմանավորվել էին։ Մոտ կես ժամ հետո նորից ներկայացուցիչ իջավ նախարարությունից՝ 4 մարդ հրավիրեց վերև՝ քննարկման, բայց քաղաքացիները պահանջեցին 5 մարդու ներս թողնել, քանի որ իրենց կազմած հանձնաժողովը 5 մարդուց է բաղկացած։ Այլ ելք չունենալով՝ ներկայացուցիչը որոշեց թույլատրել 5 հոգու մուտքը նախարարություն։

Մոտ 1 ժամ քննարկումից հետո քաղաքացիների կազմած հանձնաժողովն իջավ ներքև։ Ներսում քաղաքացիներին վստահեցրել էին, որ իրենց խնդրին անպայման լուծում կտրվի փաստաթղթերի որոշակի ուսումնասիրություններից հետո։

Քաղաքացիների բողոքն առաջարկում ենք դիտել Lurer.com-ի պատրաստած տեսանյութերում։