Դ. Դումանյան. «Դուք բոլորդ չեմպիոն եք»

ՀՀ առողջապահության նախարար Դերենիկ Դումանյանը մասնակցեց «Դինամո» մարզադահլիճում անցկացված տրանսպլանտ խաղերի փակմանը։ ԱՊՀ-ում առաջին անգամ կազմակերպված այս խաղերի նախաձեռնողը «Արաբկիր» բժշկական համալիրն էր։ Հինգ մարզաձևով իրենց ուժերը չափեցին փոխպատվաստված երիկամով 17 մարզիկ։

1991 թվականից ի վեր «Արաբկիր» բժշկական համալիրում արդեն կատարվել է երիկամի 123 փոխպատվաստում։ Սպորտային խաղերին մասնակցությունը և հետագա մարզումները կնպաստեն Հայաստանի փոխպատվաստված օրգանով մարդկանց կյանքի որակի, նրանց ֆիզիկական և հոգեկան վիճակի բարելավմանը:

Շնորհավորելով խաղերի մասնակիցներին Դերենիկ Դումանյանն ասաց. «Հարգարժան պրոֆեսոր Բաբլոյան, հարգելի հյուրեր, սիրելի մարզիկներ, այսօր ես հպարտ եմ, որ պատիվ ունեմ ողջունելու տրանսպլանտ առաջին խաղերի մասնակիցներին։ Ուզում եմ հատուկ շեշտել, որ դուք բոլորդ չեմպիոններ եք։ Չեմպիոններ եք, որովհետև առաջին հերթին հաղթել եք ձեր հիվանդությունը։ Դուք չեմպոն եք, որովհետև ուժեղ մարդիկ եք և հաղթել եք նրանով, որ ապացուցել եք, որ հաղթող տեսակ եք։

Ես ուզում եմ շնորհակալություն հայտնել բոլորիդ։ Կուզեի, որ ձեր նման հաղթող ոգի ունեցող մարդիկ մեր շրջապատում շատ լինեն' ամեն պարագայում։ Ուզում եմ նշել նաև, որ ձեր հաղթանակն ապահովել են նաև մեր հարգարժան բժիշկները' պրոֆեսոր Բաբլոյանի գլխավորությամբ։

Ուզում եմ, որ բոլորն իմանան, որ մեզանից ամեն մեկը կարող է հաղթել հիվանդությունը' բժիշկների օգնությամբ և յուրաքանչյուր պահի։

Ես բոլորիդ շնորհավորում եմ և ցանկանում, որ ձեր հաջորդ մրցասպարեզը լինեն օլիմպիական խաղերը։ Արիություն ձեզ»։

Տեղեկացնենք, որ Համաշխարհային տրանսպլանտ խաղերը հիմնադրվել են 1978 թվականին Լոնդոնում բժիշկ Մորիս Սլապակի կողմից, ով Հայաստան էր ժամանել հատուկ այս միջոցառմանը մասնակցելու նպատակով: