Լիլիթ Մարգարյան. «Նախևառաջ կնոջ աչքերը պիտի փայլեն, հետո հագուստը»

Նկարիչ մոդելավորող Լիլիթ Մարգարյանն այսօր դարձավ քառասուներկու տարեկան: Լիլիթը չի ամաչում իր տարիքից, ավելին հպարտանում է դրանով: «Ես հպարտանում եմ իմ տարիքով: Ասեմ, որ իմ ավանդույթներին չեմ դավաճանում և, ինչպես յուրաքանչյուր տարի, այնպես էլ այսօր, ծննդյանս օրը նշում եմ նախևառաջ կոլեկտիվիս՝ գործընկերներիս հետ: Նրանց համարում եմ իմ երկրորդ ընտանիքը, քանի որ իմ օրվա մեծ մասը, կյանքիս մեծ մասն անցկացնում եմ նրանց հետ: Ամենաուրախ տոներն էլ պետք է նշեմ նրանց հետ»: Այս տողերից հետո զրուցակիցս ուրախությամբ մեջբերեց, որ խոսակցության պահին էլ նստած են աղջիկներով: «Մեզ են միացել նաև իմ շատ հարազատ ընկերուհինեը և շատ հաճելի միջավայրում հիմա նշում ենք ծնունդս»:

Լիլիթ Մարգարյանի համար իր ծննդյան օրը յուրահատուկ է նաև նրա համար, որ այսօր իր սիրելի տատիկի ծննդյան օրն է: «Ես ծնվել եմ տատիկիս քառասունհինգ ամյակի օրը: Այս հանգամանքը միշտ կլինի իմ կյանքում: Սյսօր ես սիրով տոնում եմ նաև տատիկիս ութսունյոթ ամյակը»: Այս առիթով ArmStar.am-ը շնորհավորում է Լիլիթին՝ տատիկի ծննդյան օրվա առթիվ, իսկ տատիկին՝ Լիլիթի նման թոռնուհի ունենալու կապակցությամբ:

Այսօր Լիլիթին հետաքրիր անակնկալ է մատուցել իր տասնամյա որդին: «Ամենահետաքիքիր նվերն ինձ մատուցել է տղաս, ով տասը տարեկան է: Նա, ինչպես բոլոր բալիկները «կասսա» ունի հավաքած, ու իր հավաքած գումարով այսօր դպրոցից տուն վերադառնալիս ինձ համար օծանելիք է գնել: Երբ հարցրի, թե ինչպես է կարողացել օծանելիք գնել, նա պատասխանեց, որ խնդրել է, որ իրեն օգնեն՝ ասելով, որ իր մայրիկի ծնունդն է»: Տասնամյա տղայի կողմից իսկապես հիշարժան ու լավ մտածված նվեր է: Լիլիթը մեկնաբանեց նաև, որ այսօր հասկացավ, որ որդին մեծացել է: «Նա հետաքրքիր հայացքով նայում էր աչքերիս՝ տեսնելու, դուրս կգա, թե չէ: Ես հասկացա, որ տղաս մեծացել է»:

Միանշանակ բոլորս ենք հիացել Լիլիթ Մարգարյանի հիանալի գործերով ու ստեղծագործություններով: ArmStar.am-ին հետաքրքրեց նաև, թե իր ծննդյան օրվա հագուստը Լիլիթն անձա՞մբ է «կերտել», թե՞ օգտվել է որևէ բրենդային խանութի տեսականուց: «Այսօր կոնկրետ ես ոտքից գլուխ հագնված եմ իմ դիզայնով և ինձ շատ լավ եմ զգում (ծիծաղում է)”:

ArmStar.am-ը նաև փոքրիկ անդրադարձ կատարեց Լիլիթի մասնագիտական գործունեությանը: «Ես բազմաժանր եմ սիրում աշխատել: Չեմ սահմանափակվում կոնկրետ ոճով: Իմ ստեղծագործական ոճը կարելի է բնորոշել որպես ''լյուքս'': Ես շատ եմ սիրում ձեռքի աշխատանք, բայց քանի որ մարդկանց առօրյայում դրանք միշտ չեն հարկավոր, այլ ավելի կրելի, ավելի առօրյա հագուստ է հարկավոր, ես բնականաբար անում եմ ամեն ինչ: Ես աշխատում եմ լինել դինամիկ և ունիվերսալ»,-մեկնաբանեց զրուցակիցս,-«Այլ բան է, թե ինչ կցուցադրեի ցուցադրության օրը, այլ բան, թե ինչ աշխատանք եմ առհասարակ անում»: Սովորաբար մարդիկ պլանավորում են իրենց ծննդյան օրվա անելիքները, բայց քչերն են պլանավորում օրվա ավարտը:

ArmStar.am-ին հետաքրքրեց, թե արդյոք Լիլիթը պլանավորել է այն: «Ես առհասարակ մեծ կարևորություն չեմ տալիս ծննդյանս օրվան: Ես կարծում եմ, որ մարդ պիտի ուրախ լինի ամեն օր: Չգիտեմ ինչու՝ տոնական օրերը մի փոքր ուռճացրած բան եմ համարում, ճիշտ է, պետք է նշել, բայց ես ուզում եմ ամեն օր սիրված, կարևոր լինել: Այդ իսկ պատճառով ես շատ մեծ կարևորություն չեմ տալիս ծննդյանս օրերին: Մարդիկ կան չորս-հինգ ամիս առաջվանից են սկսում նախապատրաստվել, զգեստ պատվիրել և այլն, ես այդ տեսակը չեմ, ես օրը թողնում եմ ինքնահոսի. ինչ կստացվի»,- ասաց Լիլիթը: Առհասարակ մեզնում մշակույթ է ձևավորվել ծննդյան օրը, անկախ գտնվելու կամ տոնել-չտոնելու հանգամանքից, հագնվել ճոխ, երեկոյան, իսկ Լիլիթն այսօր կրում էր իր իսկ աշխատանքներից մի տաբատ և շապիկ, որը մի փոքր տարբերվում է առօրյա հագուստից, քանի որ ավելի տոնական է: «Քանի որ ես աշխատանքի եմ, հագել եմ տաբատ ու շապիկ: Շապիկս այսօր ավելի ներկայանալի է, տոնական թե’ դիզայնով, թե’ գույնով; Ես ուղղակի փորձել եմ լինել այնպիսին, ինչպիսին կամ, ոչ մի արտառոց բան չեմ արել: Ես կարծում եմ, որ ծննդյան տարեդարձին ու առհասարակ կնոջ աչքերը պետք է փայլեն և հետո միայն հագուստը»,- ավելացրեց Լիլիթը:

ArmStar.am-ը շնորհավորում է Լիլիթ Մարգարյանին իր ծննդյան տարեդարձի կապակցությամբ, մաղթում առողջություն, երջանկություն, երկարակեցություն և հարատև երիտասարդություն:

Զրուցեց Աշխեն Մնացականյանը /ArmStar.am/