Սիրուշոն չէր, որ պետք է ճանաչվեր տարվա լավագույն երգչուհի. Շուշան Պետրոսյան

Երգչուհի Շուշան Պետրոսյանի համար «Եվրատեսիլ» երգի մրցույթին «Դորիանս» խմբի ելույթն ամենալավն էր նախորդներից։ «Մեր ամենալավ ելույթն էր մեր ունեցած բոլոր նախորդ ելութներից՝ և՛ երգի առումով, և՛ կատարման։ Իրենք իրենց ֆորմատի մեջ էին՝ ռոք էին երգում, ազատ էին և ոչ մի հատուկ բան պետք չէր բեմադրության համար»- Tert.am-ի հետ զրույցում ասաց Շուշան Պետրոսյանը՝ չնայած համարի պատրաստվածության նկատմամբ հնչած քննադատություններին։ «Դե ամեն ինչի համար էլ քննադատում են, հագուստներից սկսած մինչև Գոռի հոնքերն էլ քննարկում են, թեմայա էլի, բայց միևնույնն է փայլուն կատարում էր»,-ասաց նա։

Ինչ վերաբերվում է զբաղեցրած 18-րդ հորիզոնականին, ապա Շուշան Պետրոսյանի համար այդ միավորների բաշխումը միշտ էլ կասկածելի է եղել։ «Միշտ կասկածելի է։ Պետություններ կան, որ երբեք մեզ ոչինչ չեն տվել, այս անգամ մեկ երկու միավոր տվեցին»,-ասաց նա և նշեց, որ ինքը միշտ էլ ասել է, որ չպետք է այդքան լուրջ վերաբերվել և ժամանակն է հրաժարվել մասնակցությունից։

Երգչուհին հավատացնում է, որ սփյուռքահայությունը նախորդ տարիներից ոչ պակաս է քվեարկել և անհեթեթություն է դրանից եզրակացություն անել, որ նրանք Հայաստանից երես են թեքել։ «Նման բան չկա, դա թյուր կարծիք է, որովհետև ես էլ Հայաստանում չեմ նայել, ես բազմաթիվ հարազատներ ու ընկերներ ունեմ Սփյուռքում, Եվրոպայում, մարդիկ, կան որ ընտանիքներից տասական ձայն են տվել, խնդիրը դա չի, մինչև հիմա չհասկացանք, որ դա չի»,-նշեց նա։

Ադրբեջանի մասնակցի բավական լավ ցուցանիշը՝ 2-րդ հորիզոնականում հայտնվելը, երգչուհուն այդքան էլ չի հետաքրքրում։ «Ճիշտն ասած՝ ինձ համար այնքան անհետաքրքիր է, ես մրցակցության համար չեմ նայում, տեսնեմ, թե ով ինչ երգեց, մերոնց եմ նայում և վերջ։ Բայց մի խումբ «օբյեկտիվ» հայեր քննարկում են և ասում, թե Ադրբեջանի երգը հրաշալի երգ էր, հրաշալի կատարում էր։ Եթե նույնիսկ այդպես էր, չեմ կարծում, որ մենք գոնե պետք է դրա մասին բարձրաձայնենք, զարմանալի է»,-ասաց նա։

Անդրադառնալով միաժամանակ Մոսկվայում կայացած «Տաշիր 2013» ամենամյա երաժշտական մրցանակաբաշխությանը՝ Շուշան Պետրոսյանը նշեց, որ մրցանակաբաշխությունը չի խանգարել «Եվրատեսիլին», և մարդիկ հնարավորություն են ունեցել և՛ դիտելու, և՛ քվեարկելու։ «Ինչի՞ պետք է խանգարեր, ժամի առումով ընդհանրապես չի խանգարել, մենք «Տաշիրից» վերադարձել ենք հյուրանոց և նայել ենք, ի՞նչն է խանգարել։ Քվեարկելու համար ժամի առումով այդպես բան չի եղել։ Հայի համար ի՞նչն է կարևոր. մերոնց կատարումը տեսնել։ Երկու համար էր անցել, արդեն հյուրանոցում էինք, արհեստական բաներ պետք չի սարքել»,- ասաց նա։

Ինչ վերաբերում է «Տաշիր 2013» ամենամյա երաժշտական մրցանակաբաշխության ժամանակ տարվա լավագույն երգիչ-երգչուհու ընտրությանը, ապա Շուշան Պետրոսյանը համաձայն չէ։ Նշենք, որ «Լավագույն երգչուհի» անվանակարգում հաղթեց Սիրուշոն, իսկ «Լավագույն երգիչ» ճանաչվեց Ռազմիկ Ամյանը: «Ընտրության հետ ես համաձայն չեմ։ Կարծում եմ, որ Լիլիթ Հովհաննիսյանն ամբողջ տարին այնքան լավ էր աշխատել, անկախ նրանից, ես ընդունում եմ, թե չեմ ընդունում, իսկ Քրիստինե Պեպելյանը այնքան հրաշալի մենահամերգներ է ունեցել։ Ես կարծում եմ, որ մի երգով տարվա լավագույն երգիչ չեն դառնում, նույնիսկ եթե այդ երգը շատ սիրեն։ Կարծում եմ, որ մտերիմ, հեռու, այդ բաներից պետք է ազատվել։ Կամ մրցույթներ մի արեք, կամ արեք ձեր տանը, ընտանիքի անդամներով, ընկերներով իրար գովեք, տենց չեն անում, սիրուն չի դա, սխալ ընտրություն էր»,- նշեց երգչուհին։