Հովիկ Աբրահամյանը Տիգրան Սարգսյանին «կերակրեց», իսկ պատգամավորները ստիպեցին ոտքի վրա մնալ

Կառավարությունը՝ վարչապետ Տիգրան Սարգսյանի գլխավորությամբ, Ազգային ժողովի դատին ներկայացրեց կառավարության 2013-2017թթ. ծրագիրը: Ինչպես և սպասվում էր, պատգամավորները Տիգրան Սարգսյանին ծափահարություններով չէ, որ պատրաստվել էին դիմավորել: Օրենսդիրների՝ հիմնականում քննադատական շեշտադրում ունեցող հարցադրումները զբաղեցրին ողջ օրակարգը:

Դժվար է ասել, թե սովորաբար Տիգրան Սարգսյանի աշխատանքային գրաֆիկն ինչ ելևէջումներ է ունենում, սակայն կոնկրետ այսօրվա հաշվով կարելի է միանշանակ փաստել, որ պատգամավորները ստիպեցին վարչապետին գրեթե ամբողջ օրը ոտքի վրա կանգնած մնալ: Բացառությամբ, իհարկե, ընդմիջումների, որոնցից առաջինի ժամանակ Ազգային ժողովի նախագահ Հովիկ Աբրահամյանն, ըստ երևույթին, գիտակցելով, թե ինչ օր է ունենալու իր գործընկերը, «իջեցրեց» վերջինիս խորհրդարանի նորաբաց բուֆետ՝ թե՛ բուֆետով հիանալու, թե՛ հաց կիսելու:

Ի դեպ, նման օրով վարչապետի մուտքը բուֆետ կարելի է բավական խորհրդանշական համարել նաև այն իմաստով, որ խորհրդարանի այս հատվածի վերանորոգումից հետո բուֆետի անձնակազմը՝ մինչև վերջին մարդը, աշխատանքից ազատվեց, այսինքն՝ դարձավ գործազուրկ՝ համալրելով սոցիալական խոցելի խավի շարքերը, իսկ բուֆետը շահագործման հանձնվեց մի ընկերության, որը, չնայած մոնոպոլ կոչելը դեռ վաղ է, բայց արդեն առաջատար դիրքեր է զբաղեցնում առաջատար հիմնարկ-կազմակերպությունների բուֆետների սպասարկման գործում: Իսկ այս կազմակերպությանը, բնականաբար, չէր կարող հուզել վատ պայմաններում բուֆետն աշխատացնողների (գրեթե 10 հոգի) ճակատագիրը, որոնցից միայն մեկին, ըստ երևույթին բարձրագույն հովանավորության շնորհիվ, հաջողվեց վերականգնել աշխատանքը:

Կառավարության ծրագրի քննարկումը դեռ առջևում է: Բոցաշունչ ելույթները վաղն են հնչելու, սակայն, ծանոթ պատգամավորներից մեկը պատմեց, որ կառավարության ծրագիրը մի՝ ոչ պակաս բոցաշունչ քննարկում արդեն անցել է. ՀՀԿ խորհրդի, թե գործադիր մարմնի նիստում՝ անցած չորեքշաբթի օրը՝ դեռ մինչև կառավարության նիստում ներկայացվելը, այս ծրագիրը ներկայացվել է կուսակից ընկերներին, որոնք էլ, որքան էլ անհավատալի և զարմանալի թվա, բավական ակտիվ քննարկել են այն, քննադատել, առաջարկել, մի խոսքով՝ կարգին քննարկում անցկացրել, ընդ որում, ինչպես հավաստիացրեց մեզ պատմող պատգամավորը՝ առաջարկություններից շատերը գրանցել են և պատրաստակամություն հայտնել դրանք ներառել, ծրագիրն էլ՝ շտկումների ենթարկել:

Լուսինե Կեսոյան