Հիմնական հանցագործության որջը և օջախը

Ազգային ժողովում այսօր քննարկման դրվեց «Ժառանգության» պատգամավորներ Ռուբիկ Հակոբյանի, Զարուհի Փոստանջյանի և Թևան Պողոսյանի ներկայացրած նախագիծը՝ Հայաստանի Հանրապետության ընտրական օրենսգրքում փոփոխություններ և լրացումներ կատարելու մասին։

Վերջիններս առաջարկում են հրապարակայնացնել քվեարկությանը մասնակցած ընտրողների ցուցակները։ Նախագիծը ներկայացրեց Ռուբեն Հակոբյանը։

«Եթե հիշում եք, նախորդ գումարման ժամանակ «Ժառանգությունն» ու Դաշնակցությունը միասին 11 կետից բաղկացած օրենքների փոփոխությունների փաթեթ ներկայացրին, որը բավականին լուրջ քննարկման արժանացավ ԱԺ-ում, այնուհետև՝ ՀԿ-ների կողմից, այնուհետև ուղարկվեց Վենետիկի հանձնաժողով, որտեղից ստացանք դրական պատասխան։ Բայց այսօր մեր խմբակցությունը ներկայացնում է այդ 11 կետից մեկ հարց, որը վերաբերում է ընտրություններից անմիջապես հետո ընտրացուցակների հրապարակայնացմանը, այսինքն՝ պետք է մասնակիցների այդ ցուցակները փակցնեն տեղամասերում։

Հատկապես վերջին երկու՝ նախագահական և Երևանի ավագանու ընտրությունների ժամանակ իսկապես պարզ դարձավ, որ հիմնական հանցագործությունը կատարվում է հենց ցուցակներում, լցոնումները կատարվում են հենց այն ժամանակ, երբ ցուցակները չեն հրապարակայնեցվում, և անհայտ է մնում, թե քանի հոգի է մասնակցում ընտրություններին, և մեկ էլ տեսնում ես, որ 5-10 անգամ ավելացել է ընտրողների թիվը»,-ասաց Ռուբեն Հակոբյանը։

Վերջինս բերեց նաև մեկ օրինակ։ «Ըստ սոցիոլոգիական հետազոտությունների՝ Հայաստանից բոլորից շատ արտագաղթել են Գեղարքունիքի մարզից. սա նաև պաշտոնական է, բայց պարզվում է՝ նախագահական ընտրությունների ժամանակ բոլորից շատ մասնակցությունը ունեցել է հենց Գեղարքունիքի մարզում՝ 71 տոկոս, և բոլորից շատ քվե նախագահը ստացել է հենց Գեղարքունիքի մարզում»,-ասաց պատգամավորը՝ հավելելով, որ հիմնական հանցագործության որջը, օջախը հենց սա է։