Տարիքի հետ ճաշակը փոխվում է. Հենրիկ Մխիթարյան

Ուկրաինայի առաջնության լավագույն ռմբարկու Հենրիկ Մխիթարյանը «Վեստի» պարբերականին տված հարցազրույցում խոսել է մի շարք թեմաների մասին.

«Ուկրաինայի առաջնությունում հանդես գալը հետաքրքիր է: Վերջին տարիներին ակումբներն ավելի ուժեղ են դարձել: Խփածս գոլերից ամենահիշարժանը ընթացիկ մրցաշրջանում 23-րդ գոլն էր: Այն ինձ համար ամենաթանկն ու ամենածանրն էր: Երկար եմ սպասել դրան, 3 տուր չէի կարողանում հեղինակել, և այն ինձ մեծ վստահություն և հանգստություն տվեց: Հիմա արդեն գործն արված է, ռեկորդը՝ սահմանված, և արդեն կարելի է առանց լարվածության շարունակել աշխատել: Չեմ կարող ասել, թե համաշխարհային ֆուտբոլում ով է ինձ ավելի նման, քանի որ ինձ կողքից չեմ դիտում, այդ հարցը կարող եք տալ մասնագետներին:

Ակումբի մարզաբազայում ցանկացա մնալ, որպեսզի ավելի շուտ ներգրավվեմ թիմի խաղին և կենտրոնանամ մարզումների վրա: Բացի այդ, ընկերուհի չունեմ, մայրս և քույրս այնքան էլ հաճախ չեն գալիս: Թե ինչ հնարավորություն ունեն Դոնեցկի աղջիկները՝ ինձ հետ ծանոթանալու համար, կախված է նրանցից:

Տարբեր տարիքում տարբեր ակումբների եմ երկրպագել: Նախկինում սիրում էի Մյունխենի «Բավարիան», հիմա նույնպես հավանում եմ այդ ակումբին: Ինձ դուր է գալիս նաև «Բարսելոնան»: Տարիքի հետ ճաշակը փոխվում է: Եվ չկան այնպիսի ակումբներ, որոնցից մեկի անունը ինձ մոտ հիացմունք առաջացնի: Եթե անկեղծ, ես ընդհանրապես ուշադրություն չեմ դարձնում տրանսֆերիս վերաբերյալ շրջանառվող լուրերին: Ես «Շախտյորի» ֆուտբոլիստ եմ, և մտքերս կապված են ակումբի հետ: Մտածում եմ միայն ակումբին հաղթելու գործում օգնելու մասին: Եթե իսկապես ինչ-որ առաջքարկներ կան, թող դիմեն ակումբին, և ակումբը ամեն ինչ կորոշի»: