Ռեժիմն իր վրա վերցրեց Մարտի 1-ի հանցագործության պատասխանատվությունը. Լևոն Զուրաբյան

Քաղաքական 21 Մայիս, 2013 17:39

Ազգային ժողովն այսօր շարունակեց քառօրյա նիստի աշխատանքները։ Ըստ կանոնակարգ օրենքի՝ այսօր ԱԺ խմբակցությունների հայտարարությունների օրն է։

Ելույթով հանդես եկավ ՀԱԿ խմբակցության ղեկավար Լևոն Զուրաբյանը։ Վերջինս խոսեց Մարտի 1-ի հանձնաժողով ձևավորելու նախագծի տապալման մասին։

«2008 թվականի մարտի 1-ին տեղի ունեցած ոճրագործությունը, երբ նորանկախ Հայաստանի պատմության մեջ առաջին անգամ իշխանությունները հրաման տվեցին կրակելու սեփական ժողովրդի վրա, ստեղծել է բարոյական ջրբաժան, որը թույլ չի տալու մեր հասարակությանն առաջ շարժվել այնքան ժամանակ, մինչև չեն պատժվել մարդասպանները և նրանց հրաման տված պաշտոնյաները։ Մարտի 1-ի հանցագործությունը ջրբաժան է ժողովրդի և պետական իշխանության միջև, որևէ իշխանություն երբեք չի կարողանա լեգիտիմ լինել և վայելել ժողովրդի վստահությունը, եթե մինչև վերջ պարզված չլիներ սպանությունների հանգամանքներն ու պատժված չլինեին հանցագործները։ Այդ է պատճառը, թե ինչու ՀԱԿ-ը հետևողականորեն հետապնդում է Մարտի 1-ի բացահայտման դատը։ Իրավապահ մարմինների ապօրինություններն ուսունասիրելու նպատակով հանձնաժողով ստեղծելու Կոնգրեսի օրինագիծը ստացավ հանրության և խորհրդարանում ներկայացված ուժերի լայն աջակցությունը։ Հասկանալով նախագծի մերժման պատասխանատվությունը ստանձնելու հետևանքները՝ ՀՀԿ-ն դեկտեմբերի 3-ին հրապարակային երաշխիք տվեց, որ կհամաձայնվի հանձնաժողովի ստեղծմանը, եթե օրինագծից հեռացվեն քաղաքականացման տպավորություն առաջացնող դրույթները և հարցի քննարկումը տեղափոխվի ընտրություններից հետո նույնպես այն նպատակով, որ նախագահական ընտրությունների նախօրեին հարցը չդառնա քաղաքական շահարկումների առիթ։

ՀԱԿ-ը, ղեկավարվելով ճշմարտությունը բացահայտելու անհարժեշտության գիտակցումով, ինչպես նաև՝ ընդդիմախոսների դիրքորոշումը որևէ տրամաբանական հիմնավորումից զրկելու նպատակով, համաձայնեց ՀՀԿ-ի տված երաշխիքներին։

Մայիսի 20-ին երկարատև բանակցություններից հետո ՀՀԿ-ն բացեիբաց դրժեց հրապարակայնորեն տված խոստումները՝ առաջ քաշելով նոր պայմաններ, որոնք արժեզրկում էին հանձանաժողովը որպես ճշմարտության բացահայտման գործիք։ Սրանով ռեժիմը ցույց տվեց, որ սարսափում է ճշմարտության բացահայտումից, և օրինագծին դեմ քվեարկած պատգամավորների միջոցով իր վրա վերցրեց Մարտի 1-ի հանցագործության և նրա պարտակման ամբողջ պատասխանատվությունը։ Ըստ էության, ՀԱԿ-ը ելնելով հանրության շահերից և ունենալով ընդդիմադիր այլ ուժերի աջակցությունը՝ առաջին անգամ ԱԺ-ում պայմանավորվածություն ձեռք բերեց ՀՀԿ-ի հետ, վերջինիս պահվածքը, սակայն, ցույց տվեց, որ մենք գործ ունենք անսկզբունքային, սեփական խոսքը չհարգող քաղաքական ուժի հետ։ Հրապարակայնորեն տրորելով բարոյականության բոլոր նորմերը՝ ՀՀԿ-ն խաբեց ոչ թե ընդդիմությանը, այլ ամբողջ հանրությանը, որի առջև պարտավորվել էր նպաստել Մարտի 1-ի բացահայտման բացահայտմանը։ ՀՀԿ-ն ևս մեկ անգամ ցույց տվեց, որ նրա հետ որևէ բանակցություն անիմաստ է»,-ասաց Լևոն Զուրաբյանը։