«Հայ կամերային երաժշտության անթոլոգիա»–ն

ՀՀ մշակույթի նախարարության աջակցությամբ, ՎիվաՍել-ՄՏՍ ընկերության, «Երևան Ինթերնեյշնլ Ռոտարի» ակումբի հովանավորությամբ, «Արս լունգա» դուետն իրականացրել է «Հայ կամերային երաժշտության անթոլոգիա /մաս I. Ստեղծագործություններ թավջութակի և դաշնամուրի համար)» նախագիծը:

«Հայ կամերային երաժշտության անթոլոգիա» ծրագրի ստեղծման և իրականացման գաղափարը «Արս լունգա» դուետինն է, ի դեմս Արամ Թալալյանի և Ջուլիետա Վարդանյանի: Ծրագիրը ներառում է հայ ակադեմիական երաժշտական ստեղծագործական միտքն ու ավանդույթները 20-րդ դարասկզբից մինչև մեր օրերը, այդ թվում՝ երիտասարդ սերնդի ներկայացուցիչների, ովքեր մասնակցելով ծրագրի ընթացքին իրենց ստեղծագործությունները նվիրել են «Արս լունգա» դուետին:

«Հայ կամերային երաժշտության անթոլոգիա» ծրագիրը հայ երաժշտության պատմության մեջ իր ձևով և բովանդակությամբ միակն է, քանի որ հայ կոմպոզիտորների՝ թավջութակի և դաշնամուրի համար գրված ստեղծագործությունների մեծ մասը երբևիցէ չեն կատարվել, կամ էլ կատարվել են տասնամյակներ առաջ և ձայնագրություններն արդեն վերականգնման կարիք ունեն:

«Արս լունգա» դուետը «Հայ կամերային երաժշտության անթոլոգիա» ծրագրի շրջանակներում հավաքել է 20-21-րդ դդ. 60 հայ կոմպոզիտորների՝ թավջութակի և դաշնամուրի համար գրված ստեղծագործություններ, կատարել և ձայնագրել է ժամանակակից տեխնիկայի օգտագործմամբ և ձայնագրման ժամանակակից պահանջներին համապատասխան: Արդյունքում, թողարկվել են ձայնագրությունների ժողովածուներ, որոնցից կազմված յուրաքանչյուր հավաքածու /12 ձայնասկավառակ/ ամփոփվում է այդ շարքում ընդգրկված հեղինակների կենսագրականները ներառող գրքույկում:

Թողարկված ձայնագրությունների ժողովածուները նախատեսված չեն վաճառքի համար: Դրանք կտրամադրվեն աշխարհի խոշոր համալսարանների գրադարաններին, երաժշտական փառատոներին, քոլեջներին, բուհերին, կոմպոզիտորների միություններին, դասական երաժշտություն պրոպագանդող ռադիոկայաններին:

Սեփական ձայնադարան ունեցող յուրաքանչյուր երաժշտական հաստատություն ևս կստանա այս ձայնագրությունների ժողովածուն՝ երաժշտության գրականության և պատմության դասընթացներում օգտագործելու համար:

«Հայ կամերային երաժշտության անթոլոգիա» ծրագիրը բաղկացած է մի քանի մասից: «Արս լունգա» դուետը նախատեսում է շարունակել ձայնագրությունների շարքը՝ համալրելով այն հայ կոմպոզիտորների այլ կամերային ստեղծագործություններով. դաշնամուրային տրիո, կվարտետ, կվինտետ և այլն:

Ս. թ. մայիսի 21-ին՝ ժամը 12:30-ին, «Առնո Բաբաջանյան» համերգասրահում «Արս լունգա» դուետի նախագծի՝ «Հայ կամերային երաժշտության անթոլոգիա /մաս I. Ստեղծագործություններ թավջութակի և դաշնամուրի համար/» ձայնասկավառակների հավաքածուի թողարկմանը նվիրված մամուլի ասուլիսին մասնակցում էին ՀՀ մշակույթի նախարարության ժամանակակից արվեստի վարչության պետ Սեյրանուհի Գեղամյանը, ՀՀ վաստակավոր արտիստ, «Արս Լունգա» դուետի թավջութակահար, «Հայ կամերային երաժշտության անթոլոգիա» ծրագրի համահիմնադիր Արամ Թալալյանը, «Արս Լունգա» դուետի դաշնակահար, «Հայ կամերային երաժշտության անթոլոգիա» ծրագրի համահիմնադիր Ջուլիետա Վարդանյանը, ՀՀ արվեստի վաստակավոր գործիչ, կոմպոզիտոր Տիգրան Մանսուրյանը, Հայաստանի կոմպոզիտորների և երաժշտագետների միության անդամ, կոմպոզիտոր Աշոտ Զոհրաբյանը և «Երևան Ինթերնեյշնլ Ռոտարի» ակումբի նախագահ Կորյուն Դանիելյանը: