Ինչո՞ւ է ձգձգվում Նիկոլայ Եղիազարյանի ամուսնությունը

Դերասան Նիկոլայ Եղիազարյանը, ով հանդես է գալիս «Արմենիա» հեոուստաընկերության սերիալներում, տևական ժամանակ է, ինչ հեռուստաէկրաններին չէ: esyes.am-ի հետ զրույցում Նիկոլայ Եղիազարյանն ասաց, որ կարճատև դադար է առել: «Քանի որ երկար ժամանակ էկրաններին եմ եղել, կարծում եմ, ավելի լավ կլինի, որ հեռուստադիտողները մի քիչ կարոտեն ինձ: Չորս տարուց ավելի անդադար էկրաններին եմ եղել: Բնականաբար, դադարը մի քիչ դժվար է, առավել ևս, այն դեպքում, որ ես շատ եմ սիրում իմ մասնագիտությունը»,- ասաց դերասանն ու հավելեց, որ դադարը երկար չի տևի և ինքն առաջիկայում նոր նախագծով հանդես կգա:

Դերասանից տեղեկացանք, որ առաջիկայում ոչ միայն հեռուստասերիալում, այլև ֆիլմում ներկայանալու առաջարկներ ունի, սակայն այդ ամենի մասին առայժմ չի ցանկանում մանրամասներ ներկայացնել, քանի որ առայժմ հստակ ոչինչ չկա: Այժմ Նիկոլայը զբաղված է Թատրոնի և Կինոյի պետական ինստիտուտի ավարտական քննություններով: Դերասանը նշեց, որ Թատերական համալսարան ընդունվել է դեռևս 2006 թվականին, սակայն այս տարի է ավարտում այն, քանի որ երկու անգամ հեռացվել է. «Երկու անգամ հեռացվել եմ իմ վարքի՝ բացակաների, անձնական խնդիրների պատճառով, սակայն ընդունելության քննությամբ երեք անգամ ընդունվել եմ: Պետք է նշեմ, որ դասախոսների հետ անկախ ամեն ինչից միշտ պահպանել եմ մարդկային լավ, ջերմ հարաբերությունները: Թող անհամեստ չհնչի, բայց դասախոսների կողմից սիրված եմ եղել»:

Նիկոլայի փոխանցմամբ՝ սեպտեմբերից, ամենայն հավանականությամբ, կաշխատի Գաբրիել Սունդուկյանի անվան պետական թատրոնում: «Անպայման պետք է լինեմ թատրոնում, որովհետև որպես դերասան՝ դա ինձ համար շատ կարևոր է: Գուցե շաբլոն է հնչում, սակայն եթե ավարտում ես Թատերական ինստիտուտը, պետք է աշխատես թատրոնում: Դա շատ մեծ դպրոց է»,- ասաց նա:

Դերասանի հետ զրուցեցինք նաև անձնական կյանքի մասին. տևական ժամանակ է, ինչ նա և ընտրյալը՝ Աննան, նշանադրված են, սակայն, ինչպես տեղեկացանք, առաջիկայում ամուսնանալ չեն պատրաստվում: «Արդեն մեկ տարի է, ինչ նշանադրված ենք, դրանից առաջ ևս մեկ տարի ընկերություն ենք արել, սակայն այս շրջանում կենտրոնացած ենք մեր կարիերայի զարգացման վրա և ամուսնանալ առայժմ չենք պատրաստվում»,- ասաց Նիկոլայն ու նշեց, որ սիրելին դեռ սովորում է Բժշկական համալսարանում, ինքն էլ դեռ մի շարք աշխատանքային ծրագրեր ունի: