Անդրեաս Բորգեաս. «Ղարաբաղն արժանի է ճանաչման»

Ֆրեզնոյի քաղաքային շրջանում Լեռնային Ղարաբաղի անկախության ճանաչման մասին բանաձեւի նախաձեռնող Անդրեաս Բորգեասը, չնայած թուրքական եւ ադրբեջանական կողմերի բազմաթիվ սպառնալիքներին, ոչ միայն վերահաստատում է իր կարծիքը, այլեւ փորձում դրանով վարակել հնարավորինս շատերին: «Ազատություն» ռադիոկայանին տված բացառիկ հարցազրույցում ամերիկացի պաշտոնյան հայտարարեց, որ Ղարաբաղը արժանի է ճանաչման:

«Եվ եթե մենք չկարողանանք այնպես անել, որ Վաշինգտոնը ընդունի այն, մենք պետք է Ամերիկայի մյուս նահանգներին Ղարաբաղի անկախությունը ճանաչեցնելով հասնենք նրան, որ Պետդեպարտամենտը եւ գործադիր մարմինը ողջունեն այս միտքը», - ասաց Ֆրեզնոյի վարչաշրջանի ղեկավար Անդրեաս Բորգեասը:

Հիշեցնենք, Ֆրեզնոն դարձավ Միացյալ Նահանգների Կալիֆորնիա նահանգի առաջին շրջանը, որը ճանաչեց Լեռնային Ղարաբաղի անկախությունը: Բանաձևում Ղարաբաղը ներկայացվում է՝ որպես «պատմականորեն և ազգային դիմագծով հայկական շրջան, որը գտնվում է Հայաստանի և Ադրբեջանի միջև»:

Անդրեաս Բորգեասը պատմում է , որ Լեռնային Ղարաբաղի հանդեպ իր հետաքրքրությունը սկսվել է Ղարաբաղ կատարած իր այցելությունից հետո: Ուսումնասիրելով այդ երկրի անցյալը, պատմությունը, Ադրբեջանի հետ ունեցած հակամարտությունը՝ հասկացել է, որ Ղարաբաղը թիկունքի կարիք ունի: Եվ իր համախոհ գործընկերների հետ նախաձեռնել է մի բանաձև, որի ընդունումից ժամեր հետո ոչ միայն դարձել է Ադրբեջանի թշնամին, այլ նաև սկսել է առնչվել ադրբեջանական ամենօրյա սպառնալիքներին:

«Բայց Ֆրեզնոյի շրջանի օրենսդիրներս շատ հպարտ ենք այդ բանաձևն ընդունելու և Լեռնային Ղարաբաղի Հանրապետությունը պաշտոնապես ճանաչելու համար: Հուսանք, սա վարակիչ կլինի նաև ամերիկյան այլ շրջանների, քաղաքների եւ բնակավայրերի համար, որտեղ նույնպես կընդունվեն նույնանման բանաձևեր, մինչև որ վերջապես Սակրամենտոն և, ինչու չէ, պաշտոնական Վաշինգտոնը ճանաչի ԼՂՀ-ի անկախությունը», - ասաց Բորգեասը՝ միևնույն ժամանակ ընդգծելով, որ դա դյուրին չի լինի. - «Թուրքիան և Ադրբեջանը ուժեղ լոբբիստական մեխանիզմներ ունեն, որ աշխատում են ընդդեմ, սակայն սա մեր ժողովրդավարական պրոցեսի մի մասն է, և ինչպես մենք ենք հարգում մյուսների կարծիքները, նրանք էլ պարտավոր են հարգել մերը»:

Հայաշատ Ֆրեզնոյի քաղաքային խորհրդի պաշտոնյան այժմ փորձում է իր համախոհ գործընկերների հետ թիկունք կանգնել ոչ միայն ամերիկահայերին, այլեւ, իր խոսքերով, Արցախում ապրող հայերին: «Ամերիկան չճանաչված պետությունը ճանաչելու տրամադրվածություն չունի, մենք հույս ունեք փոխել այդ», - նշեց Անդրեաս Բորգեասը եւ շարունակեց. - «Կան մարդիկ, որոնք հավատում են, որ Պետդեպարտամենտը եւ տեղական ինքնակառավարման մարմինները չպետք է խառնվեն ազգային հարցերին, սակայն ես համաձայն չեմ այդ մտքին, որովհետև մենք մեծ թիվ ենք կազմում, այստեղ կան Ղարաբաղից եկածներ, և նրանք ընտրազանգված են ներկայացնում»:

Լեռնային Ղարաբաղի անկախությունը ճանաչել են Ամերիկայի երեք նահանգներ, ինչպես նաեւ Ավստրալիայի Նոր Հարավային Ուելս նահանգը: Իսկ այս տարվա մարտին Լիտվայի և Ֆրանսիայի խորհրդարաններում ստեղծվել են Լեռնային Ղարաբաղի հետ բարեկամության խմբեր: