«Դեմ ենք գազի թանկացմանը»

Առաջիկայում գազի գնի հնարավոր թանկացման մասին լուրերը Վանաձորի Արցախ պուրակ էին բերել մի խումբ քաղաքացիների: «Ամեն ինչը թանկանում է՝ գազը, լույսը, էս երկրում ամենաէժանը մարդն է, 5 տարի հետո Վանաձորում մարդ չի մնալու,եթե հինգ հազար մարդ էլ լինի, ես կուրախանամ»,-ասում է գազի գնի բարձրացման դեմ բողոքող քաղաքացիներից մեկը:

«Գազի գնի թակացումը իր հետեւից կբերի մյուս ապրանքատեսակների գների աճին, ներառյալ որոշակի առումով նաեւ ծառայությունների մատուցման գների աճը: Ներկա վիճակում ժողովրդի սոցիալական վիճակը բավականին լարված է, արդյունքը կլինի այն, որ կհայտնվենք ուղղակի քաոսային դժոխքում: Կառավարությունը ներկայացնում է, որ իբր քայլեր է կատարում աշխատավարձերի բարձրացման տեսքով, ես կուզեի հարց տալ կառավարությանը՝ գործազուրկների թիվը մեծ է, եւ այն մարդիկ, ովքեր չեն օգտվում աշխատավարձի բարձրացումից, նրանց վիճակը ի՞նչ պիտի լինի:

Երբ աշխատավարձի բարձրացման թվերը ներկայացվում են, դրանք սպասվող, ակնկալվող գնաճի հետ չեն համընկնում: Ողբալի վիճակ է».-Aravot.am-ի հետ զրույցում ասում է Վանաձորի մեկ այլ բնակիչ Հովհաննես Ղազարյանը: «Ժառանգություն» կուսակցության Վանաձորի ստորաբաժանման երիտասարդ ակտիվիստների նախաձեռնած բողոքի ակցիան սկսվեց Արցախ պուրակից, ապա մարդիկ երթով շարժվեցին դեպի Լոռու մարզպետարան:

«Ակցիան քաղաքացիական նախաձեռնություն է: Գազի աննորմալ թանկացում է, այդ ձեւի գին աշխարհի մակարդակով անգամ չկա: ՀՀ-ում ընտանիք չկա, որին այդ ցավը, այդ խնդիրը չհուզի: Այս ամենը գալիս է նրանից, որ իշխանությունը լեգիտիմ չէ, կառավորությունը նույն անողնաշարավորների հավաքածուն է: Այս կառավարությունից որեւէ լավ սպասելիք չկա: Գործող ընտրական օրենսգրքով Հայաստանում լեգիտիմ իշխանություն չի կարող ձեւավորվել, դեռ ընտրությունը չավարտած ՌԴ նախագահը շնորհավորեց Սերժ Սարգսյանին, հետեւանքն էլ սա էր»,- լրագրողների հետ զրույցում նկատում է «Ժառանգություն» կուսակցության Վանաձորի ստորաբաժանման ղեկավար Գառնիկ Սահակյանը: Երթի մասնակիցների պահանջով ՀՀ Լոռու մարզպետ Արթուր Նալբանդյանը եւս հանդիպեց քաղաքացիներին՝ խոստանալով ժողովրդի մտահոգությունը ներկայացնել ՀՀ կառավարությանը: 

Անուշ Բուլղադարյան