Բաց նամակ Սերժ Սարգսյանին

Պարոն Սարգսյան: Ստիպված ենք կրկին դիմել Ձեզ 15.05.2013թ. Ձեզ ուղղված բաց նամակի՝ Երեւանի քաղաքապետարանի քաղաքաշինության եւ հողի վերահսկողության վարչության պետ Ասատրյան Հայկի, այսպես կոչված, պարզաբանման («Հրապարակ», 16.05.2013թ.) կապակցությամբ եւ մեր շենքն Իսակովի պողոտային կապող նեղ ճանապարհի վրա Ռուբեն Կոստանյանի (Բոգո) կողմից կառուցված պարսպի ապամոնտաժման խնդրանքով: Վերոհիշյալ վարչության պետի պարզաբանում կոչվածը ոչ այլ ինչ է, եթե ոչ քաղաքաշինական նորմերի ոտնահարմամբ կառուցված եւ բազմաթիվ խնդիրներ ստեղծած ապօրինի շինության օրինականացման շահագրգռվածություն եւ կառուցապատողի դեմ սեփական անզորությունն ու անօրեն գործողությունները թաքցնելու փորձ: Մասնավորապես, պարոն պետը, փոխանակ պարզաբանի բաց նամակում շարադրվածը, թե ինչու է քաղաքապետը բնակիչներին նախ ասել, որ այդ շինարարությունը գտնվում է իր վերահսկողության տակ, հետո արձանագրել դրա ապօրինությունը, թե ինչու են օրինականացված ապօրինի գրեթե բոլոր կառույցների շինարարությունները Երեւանում սկսվում ուրբաթ եւ ավարտվում երկուշաբթի օրերին, թե ինչ իրավունքով է քաղաքապետարանն ապօրինության մասին ահազանգած բնակիչների հեռախոսահամարները տալիս կառուցապատողին, ընդամենը կրկնում է այս ապօրինի շինարարության մասին մեր՝ բաց նամակում շարադրածը: Պարոն պետը պետք է իմանար, որ քաղաքաշինական նորմերի ոտնահարմամբ իրականացված շինարարության արդյունքում ստեղծված խնդիրները ընդամենը անօրինականության արձանագրմամբ եւ տուգանքով չեն լուծվում: Պարոնը, փոխանակ պարզաբանի, թե քաղաքապետարանն ինչու է պարսպի ընդամենը փոքր հատվածը քանդել, թե ինչպես եղավ, որ նույն ճանապարհի վրա կառուցված եւ նույն խնդիրները ստեղծած պարսպի մի մասը պետք է քանդել, մյուսը՝ ոչ, թե ինչու այդ փոքր հատվածը քանդելու արդյունքում առաջացած շինարարական աղբն ամիսներով թափված է փողոցում, ու թե ինչու քաղաքապետարանն այն չի հեռացնում, այլ ընդամենը կրկնում է մեր՝ բաց նամակում շարադրածը: Շատ լավ գիտակցելով առանց թույլտվության, քաղաքաշինական նորմերը կոպտորեն խախտելով կառուցված շինությունների ապամոնտաժման իր պարտականությունների մասին (անկախ նրանից, թե այդ անօրինությանը քանի բնակիչ է համաձայն)՝ Ասատրյան Հայկը որպես փրկօղակ է «օգտագործում» պարիսպը չքանդելու խնդրանքով քաղաքապետարան դիմած որոշ բնակիչներին: Ստիպված ենք հատուկ պետի համար կրկնել. եթե նույնիսկ դրա ապամոնտաժման պահանջով որեւէ բնակիչ բողոք չներկայացներ, եւ հազարավոր մարդիկ կողմ լինեին դրա գոյությանը, օրենքը պահանջում է ապամոնտաժել այն: Եվ կարիք չկա այդ բազմաթիվ խնդիրներ ստեղծած պարսպի գոյությանը կողմ որոշ բնակիչների հետ համաձայնության գալ, քաղաքապետարանի գործառույթներին խառնել շենքի կառավարման մարմնին (ինչպես կառուցապատողի պատվերն իրականացնելու համար ծրագրել է պետը): Եվ ընդհանրապես, անօրինության եւ օրինականության կոմպրոմիս չի լինում: Ընդամենը անհրաժեշտ է կատարել սեփական պարտականությունները: Ինչ վերաբերում է այս պարսպի անվտանգության «նշանակությանը» (որն իբրեւ «պարզաբանում» ներկայացրել է պարոն պետը), ապա այն ոչ թե անվտանգություն է ապահովում, այլ, ընդհակառակը՝ վտանգավոր է մարդկանց ու մեքենաների անվտանգության համար (մասնավորապես անձրեւային եղանակին եւ մերկասառույցի պայմաններում), եւ Ասատրյան Հայկը դրանում կարող է համոզվել՝ ընդամենը քայլելով պարսպի կողքով: Իսկ այս պարսպի կողմից ստեղծված այլ կարեւոր խնդիրների (լանդշաֆտին, գազատարին ու հոգեբանական տհաճ ազդեցությանը վերաբերող) մասին շարադրել ենք վերը նշված բաց նամակում:

Պարոն Սարգսյան, հաշվի առնելով «Հրապարակ» օրաթերթում 15.05.2013թ. ներկայացվածը եւ վերը շարադրվածը, խնդրում ենք համոզել Բոգոյին՝ թույլ տալ քաղաքապետարանին կատարել իր գործառույթները՝ ապամոնտաժել այդ պարիսպը եւ հեռացնել փողոցում կուտակված շինարարական աղբը:

Երեւան քաղաքի Ծովակալ Իսակովի պողոտայի 4/2 շենքի բնակիչներ:

Մանրամասները՝ «Հրապարակ»-ի այսօրվա համարում: