«ԱՊՀ մշակույթի մայրաքաղաք»-ը հետաձգվում է

2012-ի դեկտեմբերի 5-ին ԱՊՀ պետությունների ղեկավարների խորհրդի՝ Աշխաբադում տեղի ունեցած նիստում Գյումրին ճանաչվել է 2013 թվականի ԱՊՀ մշակութային մայրաքաղաք: Որպես ԱՊՀ մշակութային մայրաքաղաք են ճանաչվել նաև Մոգիլյովն ու Գաբալան:

Ծրագրի շրջանակներում տեղի են ունենալու մի շարք միջոցառումներ, իսկ հանդիսավոր բացումը լինելու է 2013 թվականի հունիսի 1-ին:

Սա ծրագրի մասին պաշտոնական հայտարարությունից հատված է: Հետո որպես միջոցառումների հանդիսավոր բացման օր հաստատվեց հունիսի 2-ը: Բայց, պարզվում է, այն եւս հետաձգվել է:

«Մայրաքաղաքի բացման օրը հետաձգել ենք. հունիսի 30-ին է կայանալու: Եղանակային պայմաններ թույլ չեն տալիս, եւ որպեսզի միջոցառումնը չձախողվի՝ հետաձգվեց: Աշխարհի տարբեր երկրներից հյուրեր ենք ունենալու, եւ այնպես չլինի՝ մարդկանց հրավիրենք բացօթյա միջոցառման ու, հանկարծ, եղանակը մեզ անակնկալ մատուցի»,-Lurer.com-ին փոխանցեց Գյումրիի փոխքաղաքապետ Ռուբիկ Սանոյանը:

Հարցին, եթե եղանակային պայմանները թույլ տային նախապատրաստական աշխատանքները կհասցնեի՞նք, քաղաքապետի տեղակալը վստահեցրեց. «Նախապատրաստական աշխատանքները լրիվ ավարտված են, հենց այսօր էլ մենք կարող ենք սկսել: Դեռ հունվարին հայտարարեցինք խորհրդանիշի մրցույթ, կայքը ստեղծեցինք: Մեր կողմից ծրագիրը ներկայացվել էր մշակույթի նախարարություն, հաստատված է, որեւէ խնդիր չենք ունենալու»:

Նշենք, որ Գյումրիի կետրոնական հրապարակում եւ հարող տարածքներում երթեւեկությունը դադարեցված է մինչեւ մայիսի 31-ը՝ ընթանում են ասֆալտապատման լայնածավալ աշխատանքներ:

Միջոցառումները լինելու են մինչեւ հոկտեմբերի վերջ՝ ըստ ծրագրի: Մինչեւ հանդիսավոր բացումը միջոցառումներ կանցկացվեն, եթե դրանք փակ դահլիճներում են: