Հանրահայտ բիոզուգարանների հարցը` Վերահսկիչ պալատի զեկույցում

Կառավարության այսօրվա նիստում ներկայացվեց Վերահսկիչ պալատի 2012 թվականի տարեկան հաշվետվությունը, որում անդրադարձ է կատարվել մի շարք ոլորտների աշխատանքներին:

ՀՀ էկոնոմիկայի նորանշանակ նախարար Վահրամ Ավանեսյանը, անդրադառնալով իր ոլորտում Վերահսկիչ պալատի արձանագրած թերություններին, խոսեց Հայաստանում գործող երկու բիոզուգարանների մասին:

«Մյուս հարցը վերաբերում է հանրահայտ բիոզուգարաններին: Ներկայումս երկու տեղում դրանք տեղադրած են, մեկը` Սուրբ Գրիգոր Լուսավորիչ եկեղեցու հարակից տարածքում, մյուսը՝ Տաթևում: Եկեղեցու տարածքում տեղադրվածը գործում է, իսկ Տաթևում տեղադրվածը` ոչ, ունի տեխնիկական խնդիրներ: Պետք է նշեմ, որ զուգարանների օպերատիվ խնդիրը Էկոնոմիկայի նախարարության համակարգում չի գտնվում, մենք ընդամենը տվյալ դեպքում հանդիսանում ենք մարմին, որը պետք է հետևի, թե ինչպես է իրականացվում ծրագիրը»,-ասաց նախարարը:

Միջամտելով՝ վարչապետ Տիգրան Սարգսյանը հարցրեց, թե որն է խնդիրը:

«Խնդիրը հետևյալն է, պարո՛ն վարչապետ, ծախսը գնահատվում է անարդյունավետ: Անարդյունավետության տեսանկյունից մի բան ակնհայտ  է, որ զուգարանը չի աշխատում, պետք է աշխատի, անսարքությունը փող արժի և մրցունակության հիմնադրամն այժմ զբաղվում է, որ անսարքությունը վերացնի, մյուս կողմից՝ նման զուգարանների գնումը թե՛ պետք էր, թե՛ պետք չէր: Դա խնդիր է, որը մենք կարող ենք ասել, որ եթե կառավարությունը որոշում է, որ նման ծրագիր պետք է իրականացվի, այնուհետև՝ այն գնահատել անարդյունավետ, անհասկանալի է»,-ասաց Վահրամ Ավանեսյանը:

Տիգրան Սարգսյանը նախարարին հանձնարարեց հարցը քննարկել նախարարությունում:

«Վերջին 5 տարիների ընթացքում այս թեման մշտապես քննարկվել է տուրիզմի զարգացման տեսանկյունից: Բոլորը բողոքում են, որ տուրիստական օբյեկտներում համապատասխան ծառայություններ չեն մատուցվում: Ձեր նախարարությունը նախաձեռնել էր պիլոտային պրոյեկտ, և այդ զուգարանները պետք է լինեին ինքնածախսածածկման սկզբունքով աշխատող զուգարանները, որովհետև դրանց համար վճար է հասնում, բացի դրանից, բանկոմատներ են տեղադրվելու այդ զուգարանների կողքերին, ինչպես նաև գովազդային շիթերի հնարավորություն կար: Այսինքն՝ այս բոլորը եկամուտ ապահովող աղբյուներ են, և պրոյեկտի իմաստը, երբ մեզ 5 տարի առաջ ներկայացվել էր. դրանում էր կայանում։ Հիմա, փաստորեն, այս պիլոտային պրոյեկտը չի տվել այն արդյունքները, որ մենք ակնկալում էինք, և մենք հիմա ձեզանից սպասում ենք վերլուծություն, ինչպես պետք է ՀՀ-ն այս հարցը լուծի», - ասաց գործադիրի ղեղավարը: