Գլխավոր դատախազը որպես կանոն չի ներում

Ինչպես և սպասվում էր, Զարուհի Փոստանջյանի՝ «այդ խարդախ դատախազը» արտահայտությունն էժան չէր նստելու. ընդհանրապես, կյանքը ցույց է տվել, որ Աղվան Գառնիկիչը ներողներից չէ և ովքեր համարձակվել են երբևէ անգամ նվազագույն քննադատություն հնչեցնել, այնպես են պատժվել, որ...

Երեկ հենց ԱԺ նիստի սկզբում իր պարտքն էր համարել հովանավորյալին պաշտպանել ՀՀԿ ցուցակով պատգամավոր դարձած Վահրամ Բաղդասարյանը:

«Կառավարության ծրագրի ժամանակ ինչ-որ մարդիկ կարող են վիրավորել իշխանություններին, խարդախ անվանել, անբարոյականները խոսել բարոյականությունից»: Թերթերից մեկին տված հարցազրույցում «անբարոյական» արտահայտությունը կրկնել էր նաև դատախազի եղբայր Ռուբեն Հովսեփյանը, ով ևս եղբոր հովանավորությամբ այս գումարման ժամանակ հայտնվեց խորհրդարանում թիվ 6 ընտրատարածքից:

Սակայն այն, ինչ այսօր հնչեցվեց ՀՀԿ խմբակցության մակարդակով, երևի թե աննախադեպ էր:

«Ազգային ժողովի տիկնոջը պետք է հիշեցնել, որ ԱԺ-ն մայրուղի չի, որ մեքենա կանգնեցնի ու նեղանա, որ չեն կանգնում»,- կառավարության ծրագրի վերաբերյալ Հանրապետական խմբակցության տեսակետն արտահայտելու ժամանակ հայտարարեց խմբակցության ղեկավար Գալուստ Սահակյանը:

Եզրափակիչ ելույթում վարչապետ Տիգրան Սարգսյանն ազդարարեց, թե Ազգային ժողովի դահլիճում այս օրերին արդեն իսկ տեղի ունեցավ իր մտքի հեղափոխությունը: Արդյո՞ք Գալուստ Գրիգորիչի «առաջընթացն» այդ շարքից էր, կիմանա հեղափոխության հեղինակը:

Ի դեպ, Փոստանջյանի «պատիվն» այդպես էլ պաշտպանող չեղավ, պատգամավորն ինքն էլ, կարծես թե, ձեռնպահ մնաց հակադարձելուց:

Լուսինե Կեսոյան