ԱԶԲ–ն հետաքրքրված է սեյսմիկ պաշտպանության խնդիրներով

Մայիսի 24-ին ՀՀ ԱԻ նախարարություն էին այցելել Ասիական զարգացման բանկի (ԱԶԲ) ներկայացուցիչները։ Այցի հիմնական նպատակն էր քննարկել ԱԻ նախարարության և Ասիական զարգացման բանկի միջև համագործակցության ուղղությունները։

ՀՀ ԱԻ փոխնախարար Հայկարամ Մխիթարյանի հետ հանդիպման ընթացքում բանկի ներկայացուցիչ նշեց, որ իրենք շատ են կարևորում աղետներին պատրաստվածության խնդիրները՝ մասնավորապես մեծ ուշադրություն դարձնելով սեյսմիկ անվտանգության հետ կապված հարցերին։

Փոխնախարար Հ. Մխիթարյանը, ողջունելով հյուրերին, նշեց, որ դեռևս անցյալ տարի կայացած հանդիպումից հետո ԱԻՆ ՍՊԾ գործակալությունը 2 ծրագիր էր մշակել. մեկը դպրոցներում երկրաշարժի դեպքում վարքականոնների վերաբերյալ ուսուցում անցկացնելու, մյուսը՝ Երևանի հատուկ և կարևոր նշանակության օբյեկտների սեյսմիկ խոցելությունը գնահատելու մասին:

ՍՊԾ գործակալության պետ Հ. Պետրոսյանը հավելեց, որ ծրագրերը փորձաքննություն են անցել և հաստատվել կառավարության կողմից։

Հայաստանում Ասիական զարգացման բանկի մշտական ներկայացուցիչ Դեյվիդ Դոուլը, ընդգծելով, որ իրենք մեծ նշանակություն են տալիս սեյսմիկ պաշտպանության բնագավառին և տեղեկացնելով, որ բանկն արդեն տեխնիկական աջակցության ծրագիր է իրականացնում ՀՀ 4 քաղաքում (Գյումրի, Վանաձոր, Դիլիջան, Ջերմուկ), առաջարկեց այդ ծրագրերի իրականացումը սկսել հենց այդ քաղաքներից, իսկ հաջողության դեպքում հետագայում տարածել նաև մյուս մարզերի վրա։ Ըստ այդմ՝ նախատեսվում է նշված քաղաքներում իրականացնել դպրոցների, հիվանդանոցների և պետական կառավարման մարմինների շենքերի սեյսմիկ խոցելիության գնահատում։

Պարոն Դոուլն առաջարկեց նման պիլոտային ծրագիր իրականացնել նաև մայրաքաղաքի դպրոցներից մեկում, որից հետո անհրաժեշտության դեպքում իրականացնել շենքի ամրացում և կազմակերպել աշակերտների ու անձնակազմի ուսուցում։ Արդյունքների վրա հիմնվելով՝ հնարավոր կլինի մշակել ավելի լայնածավալ նախագիծ։ Այս առաջարկները ներկայացվել են ԱԶԲ ղեկավարությանը և ստացել նախնական համաձայնություն։

ԱԻ փոխնախարար Հ. Մխիթարյանը հավաստեց, որ ԱԻ նախարարությունը պատրաստ է համագործակցության և հնարավորինս կաջակցի ծրագրերի արդյունավետ իրականացմանը։