«Ոսկե ծիրան» 10-րդ երևանյան միջազգային կինոփառատոնը հոբելյանական տարում կյուրընկալի նշանավոր կինոգործիչների

ՀՀ մշակույթի նախարարության աջակցությամբ, ՎիվաՍել-ՄՏՍ-ի հովանավորությամբ՝ ս. թ. հուլիսի 7-14-ը կանցկացվի «Ոսկե ծիրան» 10-րդ երևանյան միջազգային կինոփառատոնը:

2013 թվականը «Ոսկե ծիրան» փառատոնի համար առանձնահատուկ է. հոբելյանական այս տարում փառատոնին կհյուրընկալվեն կինոյում մեծ վաստակի համար «Փարաջանովյան թալլերի» արժանացած նշանավոր կինոգործիչներ Քշիշտոֆ Զանուսին, Գոդֆրի Ռեջիոն, Յոս Ստելինգը: Շառլ Ազնավուրի անվան հրապարակում կտեղադրվի աշխարհահռչակ շանսոնյե, կինոդերասան Շառլ Ազնավուրի աստղը:
«Ոսկե ծիրան» երևանյան միջազգային կինոփառատոնն այս տարի ստացել է շուրջ 1200 հայտ՝ աշխարհի 94 երկրից (2012 թ.՝ 67 երկիր), ինչը վկայում է, որ «Ոսկե ծիրան»-ի հանդեպ հետարքրությունն օրեցօր մեծանում է: Կինոփառատոնն այս տարի ևս կներկայանա լիամետրաժ, վավերագրական, «Կորիզ» կարճամետրաժ ֆիլմերի միջազգային, ինչպես նաև «Հայկական համայնապատկեր» ազգային մրցութային ծրագրերով:

Մրցութային ծրագրերում ընդգրկված ֆիլմերը գնահատելու է չորս ժյուրի:

Խաղարկային ֆիլմերի միջազգային մրցույթի ժյուրին կգլխավորի հունգարացի ականավոր կինոռեժիսոր, համաշխարհային կինոյի դասական Իշտվան Սաբոն, իսկ «Վավերագրական ֆիլմերի միջազգային մրցույթի» ժյուրին կգլխավորի 2012 թ. «Ոսկե ծիրան»-ի դափնեկիր, նշանավոր կինոռեժիսոր Սերգեյ Լոզնիցան:

Փառատոնի օրերին կաշխատեն նաև Կինոգետների և կինոքննադատների միջազգային ֆեդերացիան (ՖԻՊՐԵՍՍԻ) և Էկումենիկ ժյուրին:
«Ոսկե ծիրան»-ի արտամրցութային ծրագրերը բազմազան են. առանձնակի նշանակություն և կարևորություն ունեն «Երևանյան պրեմիերաներ», «Հետահայաց ցուցադրություններ» և «Հարգանքի տուրք» ծրագրերը, որոնցում անակնկալներ են սպասվում համաշխարհային կինոյի վարպետներից:

Փառատոնի շրջանակում կանցկացվի նաև հոբելյանական ծրագիր՝ նվիրված Արամ Խաչատրյանի 110, Ներսես Հովհաննիսյանի 75, Արտավազդ Փելեշյանի 75 ամյակներին:

Մինչև փառատոնի մեկնարկը, միջազգային ճանաչում ունեցող մասնագետների և Արևելյան գործընկերության երկրներից ժամանած երիտասարդ կինոգետների, կինոքննադատների մասնակցությամբ նախատեսվում է իրականացնել նաև դասընթաց' «Կինոլրագրություն առանց սահմանների» խորագրով: Այնուհետև, փառատոնի օրերին համատեղ ուժերով կհրատարակվի «Ոսկե ծիրան» ամենօրյա պարբերականը:
«Ոսկե ծիրան» հոբելյանական 10-րդ կինոփառատոնը կլուսաբանեն ոչ միայն հայաստանյան ԶԼՄ-ները, այլև միջազգային ճանաչում ունեցող հեռուստաալիքներ և պարբերականներ, մասնավորապես՝ «Euronews»-ը, «Культура»-ն, «The national»-ը, «Site and sound»-ը և այլն:

Ս. թ. մայիսի 24-ին, ժամը 12:00-ին, ՀՀ մշակույթի նախարարությունում «Ոսկե ծիրան» 10-րդ երևանյան միջազգային կինոփառատոնին նվիրված մամուլի ասուլիսին մասնակցում էին ՀՀ մշակույթի նախարար Հասմիկ Պողոսյանը, ՎիվաՍել-ՄՏՍ ընկերության գլխավոր տնօրեն Ռալֆ Յիրիկյանը, «Ոսկե ծիրան» երևանյան միջազգային կինոփառտոնի տնօրեն Հարություն Խաչատրյանը, «Ոսկե ծիրան» երևանյան միջազգային կինոփառատոնի ծրագրերի տնօրեն Միքայել Ստամբոլցյանը, «Ոսկե ծիրան» երևանյան միջազգային կինոփառտոնի գեղարվեստական տնօրեն Սուսաննա Հարությունյանը: