Մի տնից չենք, մի հալից ենք. «ՀայՌուսգազարդ»-ի՝ հասարակության հետ կապերի բաժնի պետ

«Ազատություն» ռ/կ-ի ֆեյսբուքյան ասուլիսի հյուրը «ՀայՌուսգազարդ»–ի՝ հասարակայնության հետ կապերի բաժնի պետ Շուշան Սարդարյանն է։

Վերջինս նախ նշեց, որ ինքը ևս գազասպառող է և գազի գնի թանկացումից հետո իր ընտանեկան ծախսերը կվերանայի. «Գազը հանդիսանում է այլընտրանքային էներգակիր, և յուրաքանչյուր ոք իրավունք ունի որոշելու, թե որ էներգակրից արժե օգտվել»,- ասաց նա՝ ասելով. «մի տնից չենք, մի հալից ենք»:

Սարդարյանի պնդմամբ՝ գազի թանկացման մասին քննարկումների մասին մամուլում բազմաթիվ հրապարակումներ եղել են նաև նախկինում, և այս թանկացումը չպետք է հանկարծակի համարել:

Շուշան Սարդարյանը հաստատեց նաև, որ «ՀայՌուսգազարդ»-ում նախատեսվում է աշխատավարձի բարձրացում, բայց  և վստահեցրեց, որ «ՀայՌուսգազարդն» աշխատում է վնասով, և հերքեց ընկերության գերշահույթների մասին պնդումները:

«ՀայՌուսգազարդ»-ում միջին աշխատավարձը 150 հազար դրամ է, և տեսակետը, թե մինչև 5000-6000 դոլար աշխատավարձ ստացող կա, իրականությանը չի համապատասխանում: Ընկերությունում 80-100 մարդ բարձր աշխատավարձ է ստանում, բայց դա չի նշանակում, որ համակարգում աշխատավարձերը բարձր են, քանի որ «ՀայՌուսգազարդը» ունի մոտ 6000 աշխատակից»,- ասաց նա և վերջում հավելեց նաև, որ ոչ մի իրավական նորմ մեզ չի պարտադրում Ռուսաստանից ստացվող գազի մասին Ռուսաստանի հետ երկկողմանի պայմանագրերը հրապարակել: